‘Dispela Buk i Save Lus Oltaim’

Wanpela tisa bilong wanpela hai-skul long Kalifonia, long Amerika, i tok olsem long wanpela buk tok Inglis, ol i kolim Questions Young People Ask​—⁠Answers That Work. Skul i makim wanpela hap taim long olgeta de bilong ol sumatin i ken kaunim wanem wanem buk ol yet i laikim. Tisa hia i putim dispela buk na sampela buk moa bilong ol sumatin i no bin kisim buk bilong ol yet i kam.

Em i tok: “Ol sumatin long klas bilong mi i save laikim tru dispela buk. Buk i save lus i go inap sampela aua o sampela de, na bihain i kam bek. Ol sumatin i save askim ol pren bilong ol, ‘Yu bin kaunim dispela hap tok?’ o ol i tok, ‘Em gutpela buk.’ Ol i save soim sampela tok long ol pren na bihain ol i go sindaun gen na kaunim sampela tok moa.

“Ol i save brukim kona long sampela pes bilong makim sampela tok, na ol i save kaunim kaunim na buk i bagarap liklik. Wanpela hap ol i save kaunim kaunim, em sapta 23, nem bilong en ‘Olsem Wanem Long Mekim Maritpasin Taim Mi No Marit Yet?’ Ol sumatin i save laikim ol piksa, na ol i pilim tru ol liklik tok i kamapim stori bilong piksa. Mi lukim wanpela sumatin i kaunim sapta i stori long askim olsem: ‘Bilong Wanem Papamama i Katim Marit?’

“Bihain liklik, namba wan buk i lus olgeta, olsem na mi putim narapela. Bihain moa, namba wan buk i kam bek, olsem na nau i gat tupela i stap. Mi putim namba wan buk inap olsem 3-pela o 4-pela mun i go pinis, na ol sumatin i wok yet long kaunim kaunim.”

I gat 39 sapta long dispela buk na nem bilong sampela em olsem: “Olsem Wanem Mi Inap Painim Ol Gutpela Pren?” na “Gutpela Skin Em Bikpela Samting?” na “Olsem Wanem Mi Inap Save Mi Givim Bel Tru Long Em o Nogat?” Sapos yu laik kisim dispela gutpela buk, orait raitim nem na atres bilong yu long hap pepa daunbilo na salim i kam.

Mi laik kisim dispela buk tok Inglis i gat strongpela skin na 320 pes, nem bilong en Questions Young People Ask—Answers That Work.