Ol i Putim Bek Nem Bilong God

WANPELA nius bilong Jemani (Schwarzwälder Bote) i tok: “Inap 60 yia i lus na nau tasol ol man i putim bek nem bilong God, ‘JHWH,’ em God bilong ol Juda na ol Kristen tu, long ples man i bin penim long pastaim.” Ol i putim bek long poret bilong haus kaunsil long taun Hob long hap bilong saut long Jemani. Tasol bilong wanem ol man i bin rausim?

Nius i stori olsem pastaim wanpela man i bin penim ol piksa long poret bilong haus bilong bilasim na em i putim nem bilong God tu, olsem 4-pela leta Hibru.

Nius i stori moa olsem: “Dispela nem i stap planti taim long Baibel, winim 6,000 taim, na em olsem ‘Jehova’ o kain tok olsem long tok Jeman. Ol man i no save tru ol i mas kolim dispela 4-pela leta Hibru olsem wanem, long wanem, long rait Hibru bilong bipo ol i no save raitim ol vaul (a, e, i, o, u) namel long ol leta. Man i kaunim, em i kolim.”

Tasol long yia 1934 ol mausman bilong lain politik ol i kolim Natsi i pasim tok olsem dispela nem ‘i no stret wantaim tingting bilong ol man long nau,’ na ol i tokim ol man long penim na haitim. Tasol gutpela tru, nau ol i putim bek nem bilong God. Nius i tok, ‘Nau planti man i save go lukim ol piksa na rait na mak samting i stap long poret bilong dispela haus kaunsil long Hob.’