Ol i No Pos Nating Tasol

Ol man i save go lukim ol pos ston i sanap insait long Biksolwara Mediterenian klostu long taun Sisaria long nambis, em wanpela olpela taun bilong kantri Israel i gat pasis. Ol i laik save long ol dispela pos. Bikman Herot i bin wokim dispela pasis, na em i kolim dispela taun olsem Sisaria bilong litimapim nem bilong Sisar Ogastus.

Ol saveman i bin digim graun long dispela hap na ol i painim pinis planti haus bilong dispela taun bilong bipo, na bikpela haus bung tu. Na ol i bin go insait long solwara tu bambai ol inap save olsem wanem ol man i bin wokim dispela pasis na dispela taun.

Wanpela nius (The New York Times bilong Janueri 8, 1991) i stori long ol i painim pinis sampela pos ston bilong wanpela haus king i bagarap pinis na bipo hap bilong en i sanap antap long ol pos insait long solwara. Ol dispela pos i bikpela samting, long wanem, ol man i bin katim rait long en i kolim nem bilong sampela namba wan gavman em Rom i makim na bipo ol man i no save long ol. Rait i stori tu long man bilong lukautim ol sip, em namba wan rait i stori long samting bilong dispela pasis.

Ol man i save long Baibel ol i save, taim aposel Pol i pinisim tupela raun bilong em long mekim wok misineri, sip bilong em i bin sua long dispela pasis. Em i stap long haus bilong evanjelis Filip long dispela taun, na stori bilong em long ol samting i bin painim em i mas strongim tru ol disaipel. (Aposel 18:​21, 22; 21:​7, 8, 16) Planti gutpela stori bilong em i stap long hap bilong Aposel long Baibel.

Olsem na ol dispela pos i no pos nating tasol bilong bipo. Nogat. Ol i kirapim ol Kristen long tingim bikpela wok ol brata bilong ol long bipo i bin mekim, em ol i bin autim tok long ol ples pasis na “i go inap long olgeta hap bilong graun.”​—⁠Aposel 1:⁠8.

[Piksa Kredit Lain long pes 32]

Garo Nalbandian