Ol i Go Helpim Ol Brata Long Yukren
PLANTI taim ol nius i stori long mani i sot, na ol wok bisnis i bagarap, na kaikai i sot, na i gat hangre. Kain hevi olsem i save bagarapim ol man long olgeta hap, na nau i kamap long sampela kantri bipo ol i aninit long gavman bilong Soviet Yunion, em dispela gavman i pinis nau. Olsem na Lain Bilong Bosim Ol Witnes Bilong Jehova i tokim brens-ofis long Denmak long stretim rot bilong helpim ol Witnes long hap bilong Yukren, em ol i sot long kaikai samting. Orait, ol brata long Denmak i bin mekim wanem?
Kwiktaim ol i kirap stretim rot! Wantu tasol brens-ofis i salim sampela brata i go long ol maket bilong baim gutpela kaikai i no gat bikpela pe tumas. Ol i salim tok long olgeta kongrigesen bilong lain bilong Jehova long Denmak na tokim ol long dispela hevi bilong ol brata bilong ol. Brens-ofis i ripot olsem: “Olgeta kongrigesen i gat bikpela laik long givim samting bilong helpim ol brata. Nau mipela inap mekim sampela samting i kamapim tru wari bilong mipela long ol dispela brata i karim hevi.” Na sampela brata long Jemani i givim 5-pela trak, na brens-ofis bilong Sosaiti long Jemani i salim ol dispela trak i go long Denmak. Dispela 5-pela trak na tupela liklik bas na 14 draiva ol i kamkamap long brens-ofis long Denmak long Sarere, Disemba 7, 1991. Ol kaikai ol brata long brens i bin baim, nau ol i pulimapim long ol dispela trak na bas.
Long belo long Mande, Disemba 9, ol dispela trak na bas i lusim brens-ofis na bihainim longwe rot i brukim hap bilong Yurop na i go kamap long kantri Yukren. Brens-ofis i stori olsem: “Gutpela pasin sori tru i bin kamap—olgeta brata sista i wok long brens ol i bung bilong tok gutbai long ol dispela brata. Mipela i save ol man nogut i save bagarapim planti man i go mekim kain wok olsem, na taim ol dispela brata i raun long dispela longwe rot i go, long olgeta taim mipela i tingim ol na beten bilong helpim ol.”
Long Disemba 18 brens-ofis i harim tok olsem ol brata i kamap gut long Levov, long Yukren. Ol brata long Yukren i kisim pinis ol samting bilong helpim ol. Ol draiva i no tingting planti moa—ol i amamas long rausim ol bikpela katon kaikai long ol trak na givim long ol brata. I gat 1,100 katon, em hevi bilong olgeta wan wan long skel inap 20 kilogram, na olgeta wan wan i gat mit na plaua na rais na suga samting inap long wanpela famili! Ol dispela trak na bas i bin karim planti samting i go, em hevi bilong en long skel inap olsem 22 ton. Brens-ofis long Denmak i tok: “Mipela i amamas tru—mipela i tenkyu long Jehova i lukautim ol brata na em i opim dispela rot long mipela bilong mipela i ken helpim ol brata.”
Ol i pasim tok long salim laplap tu i go. Brens-ofis i tok, ol kongrigesen i bin givim planti laplap moa yet bilong helpim ol brata. Tru tumas, Jehova i save ‘givim planti samting long lain bilong em na ol inap helpim ol narapela.’ (2 Korin 9:11) Na taim ol i givim samting bilong helpim ol brata sista bilong ol, ol yet i kisim bikpela amamas tru. Dispela pasin sori ol i mekim em i wanpela mak bilong ol manmeri i disaipel tru bilong Jisas. (Jon 13:35) Kain pasin sori olsem i save kamap wan wan taim tasol nau long dispela taim bilong planti man i sot long samting.