Wanpela Lotu i ‘Bihainim Kain Kain Rot’
Taim gavman bilong Hangari i givim orait long lotu Momon (Church of Jesus Christ of Latter-day Saints) long mekim wok long dispela kantri, wanpela nius (The Wall Street Journal) i tok: “Yumi kirap nogut long lotu Momon inap kamap strong insait long ol kantri demokratik i fri liklik na insait long ol kantri i gat hatpela gavman tu.” Nius i tok: “As bilong dispela i no olsem ol Momon i save kamapim planti pikinini, o ol i save wok strong long autim tok bilong ol. Nogat. As bilong dispela i olsem: Ol i bihainim kain kain rot bilong kirapim ol man long laikim lotu bilong ol.” Ol i mekim olsem wanem?
Nius hia i stori long taim ol bikpela senis i no bin kamap yet long ol gavman long Isten Yurop na i tok: “Ol Momon bilong Yunivesiti Brigam Yang i wokim musik na mekim ol singsing bilong ples na long dispela rot ol i abrusim ol hevi i save painim ol misineri long planti kantri Komyunis, em gavman i laik pasim wok bilong ol na i no save wok gut wantaim ol.” Ol lain Momon bilong mekim singsing ol i bin i go long planti kantri, olsem long Romenia, Sekoslovakia, Hangari, Polan, Rasia, Saina, na ol i go tu long Saudi Arebia, Libia, Isip, Jordan, Somalia, Israel. Na tu “ol Momon i bin mekim wok long bikpela mani bilong ol bilong kirapim ol kantri komyunis na ol kantri i stap rabis long laikim lotu bilong ol.” Mani bilong ol Momon i helpim sampela wok bilong pasim wara na wokim dem, na bilong painim wel insait long graun.
Long nau ol manmeri i save laikim tumas ol amamas bilong skin na ol i laikim tumas mani, olsem na dispela pasin bilong ol Momon long mekim singsing na givim mani i pulim planti lain long laikim ol na bihainim lotu bilong ol. (2 Timoti 3:2, 4) Tasol maus bilong Gutpela Wasman i save pulim ol sipsip tru i go bihainim em. (Jon 10:27) Olsem na em i tokim ol man i bihainim em, ‘Yupela i go mekim olgeta lain manmeri i kamap disaipel bilong mi,’ tasol em i no tok ol i ken bihainim kain kain rot bilong mekim dispela wok. Em i tok, ol i mas ‘lainim ol long bihainim olgeta tok em i bin givim long ol.’ (Matyu 28:19, 20) Bilong mekim olsem, ol i no ken lusim ol lo bilong Baibel liklik.