Ol Man Bilong Gibeon—Ol i Laik Sindaun Gut Wantaim Ol Narapela
DISPELA biktaun i stap antap long liklik maunten long piksa hia, i makim ples ol Gibeon i bin i stap long en long bipo. Dispela ples i stap klostu liklik long Jerusalem, inap 10-pela kilomita long hap bilong not.
Bihain liklik long taim Josua i kisim lain Israel i go insait long Graun Bilong Promis na ol i daunim Jeriko, bikpela stori bilong ol Gibeon i bin kamap. Dispela lain bilong Kenan i save ol i no inap winim ol Israel long taim bilong pait, long wanem, God i stap wantaim lain Israel na em i helpim ol. Orait ol i ken mekim wanem? Ol i salim sampela man bilong lain bilong ol i go long ol Israel na ol i giaman olsem ol i kam long wanpela longwe ples. Dispela wok ol i mekim bilong sekan wantaim ol Israel i kamap gutpela—ol Israel i mekim kontrak bilong sindaun gut wantaim ol. Taim ol Israel i save long trik bilong ol Gibeon, ol i mekim ol Gibeon i kamap man bilong katim paiawut na karim wara.
Yumi ken save God i no kros long dispela lain ol i wok long sindaun gut wantaim ol narapela. Taim ol 5-pela king i laik pait wantaim ol Gibeon, God i helpim Josua long daunim ol dispela king—God i wokim mirakel na san i no go daun kwik long dispela de.—Josua 9:3-27; 10:1-14.
Ol man i digim graun long dispela liklik maunten na ol i lukim wanpela hul ol man bilong bipo i bin katim long ston na i go daun insait tru long graun na i gat wara long en, olsem liklik raunwara. I gat lata na ol Gibeon inap go daun insait bilong kisim wara. Ating dispela raunwara em “raunwara bilong Gibeon” em 2 Samuel 2:13 i stori long en? Ol man bilong painim samting bilong bipo ol i lukim tu sampela rum olsem hul ston ol man i bin wokim, na insait i gat ol samting bilong wokim wain. Em nau, i olsem ples Gibeon i wanpela as ples bilong wokim wain.
Long taim bilong Devit, haus sel bilong trupela God i stap long Gibeon. King Solomon i bin kam long dispela ples bilong mekim ol ofa. Jehova i tok promis long Solomon long wanpela driman long givim “gutpela tingting na save” long em na planti mani samting. (1 King 3:4-14; 2 Stori 1:3) Stori i stap long pes 12-17 bilong dispela Wastaua i makim olsem ol tumbuna pikinini bilong ol man i bin stap long Gibeon i kisim sampela gutpela wok insait long lain bilong God long bihain. Yu save long wanem rot ol i bin kisim dispela?
[Piksa Kredit Lain long pes 32]
Pictorial Archive (Near Eastern History) Est.