Haus i Paia, Tasol Ol i Wokim Narapela
“PAIA! Paia! Haus Kibung bilong ol Witnes Bilong Jehova i paia!” Strongpela singaut olsem i kamap long wanpela Fraide long apinun long Oktoba 1989 long Hirenvin, em wanpela taun long hap bilong not long kantri Holan.
Ol Witnes bilong Jehova i bin mekim wok long dispela gutpela Haus Kibung inap 11-pela yia. Klostu olgeta Sarere Sande planti handet i bin bung long dispela haus bilong mekim kibung sekit o bikpela de kibung. Dispela Haus Kibung em wanpela gutpela ples bilong sindaun na lainim ol tok bilong Baibel.
Taim ol i mekim wok long rup bilong Haus Kibung, wanpela popaia i kamap, na wantu tasol paia i kamap na i kukim haus olgeta. Tasol gutpela tru i no gat wanpela man i kisim bagarap.
Ol Witnes i bel hevi long dispela samting i bin kamap, tasol bel bilong ol i no bagarap olgeta. Ol i kirap redim rot bilong wokim nupela haus long narapela hap. Ol i kisim gutpela hap graun bilong wokim haus long Swifteban long provins Flevolan. Bipo dispela traipela hap graun i bin stap insait long wanpela raunwara (Saider Si), na graun i stap daunbilo long mak bilong solwara inap 5 mita.
Long Janueri 1991 ol Witnes i harim tok olsem ol i ken kirap wokim nupela Haus Kibung. Ol bai wokim dispela haus namel long mun Me na mun Septemba 1991. Long laik bilong ol yet planti handet Witnes i go mekim wok bilong sanapim dispela haus, na sampela yangpela man i tingim dispela wok em rot bilong kirap long mekim wok bilong Jehova long olgeta de. Planti man i kam long Beljam na Inglan long mekim wok.
Ol i wokim wanpela naispela haus tru. I gat ples bung bilong ol man i ken sindaun na harim ol tok na i gat ples bilong kaikai, na namel long dispela tupela ples ol i wokim rot bilong wokabaut na ol i putim glas antap olsem rup. Bikpela ples bung long dispela Haus Kibung em inap long 1,008 manmeri i ken sindaun long en, na i gat narapela rum klostu na inap olsem 230 manmeri i ken sindaun long en na lukim program bilong kibung long televisen.
Long nau, planti tausen i tok: “Kam, yumi go long maunten Saion, em maunten bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim.” (Aisaia 2:2, 3) Dispela nupela Haus Kibung em wanpela bilong ol planti haus bilong bung na lain long ol tok bilong God. Narapela em Haus Kingdom bilong ol Witnes Bilong Jehova long hap bilong yu. Sapos yu go long Haus Kingdom, bai ol Witnes i amamas long lukim yu.