Ol Binen Inap Skulim Ol
‘Nau ol ensinia i kisim save long samting em oltaim ol binen i bin save long en, em olsem: Sapos man i laik wokim samting i strong long samting i no strong, em i mas wokim i gat sikspela sait olsem olgeta wan wan liklik hap bilong haus bilong binen.’—The New York Times, October 6, 1991.
SAPOS ol man i skelim gut ol binatang, dispela inap givim save long ol, olsem wanpela bilipman bilong bipo, em Jop, i bin tok: “Yupela go askim ol abus na pisin na pis na bai ol i skulim yupela. . . . Olgeta i save pinis long dispela ol samting Bikpela i save mekim.” (Jop 12:7-9) Tru tumas, bikpela save bilong Man bilong wokim yumi i kamap ples klia long ol samting em planti man i save long en, kain olsem haus bilong binen.
Ol binen i wokim ol banis bilong ol liklik hap bilong haus long samting kain olsem gris kandel, na banis i liklik tru (.33 bilong wanpela milimita), tasol i strong tru, inap long karim samting i hevi tru, winim hevi bilong en inap 30 taim.
Ol man i save wokim samting i gat ol liklik hul i gat 6-pela sait bilong en olsem haus bilong binen, bambai i gat strong bilong lukautim sampela samting bilong ol na i no ken bagarap, olsem samting bilong ami ol i karim long balus na pasim long ambrela bilong tromoi i go daun long graun. Wanpela nius (The New York Times) i stori long dispela olsem: “Hevipela samting olsem ka bilong ami, em ol i save pasim long wanpela kain bet i gat samting olsem haus bilong binen aninit long en, na taim ka i go daun paitim graun i no ken bagarap.”
Ol samting ol man i wokim olsem haus bilong binen, em ol i wokim long kain kain samting; planti ol i wokim long pepa. Ol i tanim wanpela kain blut wantaim pepa i gat tret slika long en na wokim ol samting olsem haus bilong binen na putim insait long banis bilong sampela bikpela balus. Olsem bai banis i strong, tasol i no hevi. Olsem wanem i no hevi?
Long wanem, win i stap namel long ol dispela wan wan samting ol i wokim olsem haus bilong binen na win i no hevi. Na win inap pasim hat na nois samting tu.
Binen i no “save” long olgeta dispela samting, long wanem, em i no skul na kamap ensinia. Tasol long olgeta de em i mekim wok bilong en long save God Jehova i bin putim long skin bilong en.