“Meri Bilong Yu”

WANPELA nius (Los Angeles Times) i tok: “Planti man na meri i bagarapim marit.” Wanpela dokta (em Frank Pittman) i tok, inap 50 pesen bilong ol man marit i no stap gut long meri bilong ol, na inap 30 i go inap 40 pesen bilong ol meri marit i no stap gut long man bilong ol. Sapos dispela tok i stret, orait long olgeta 10-pela 10-pela marit, inap 5-pela i no stap gut long poroman marit bilong ol.

Olsem na ating i no gat rong long mekim pasin pamuk na bagarapim marit, a? Nogat tru! Maski planti man i bagarapim marit, dispela samting i no makim olsem i no gat rong long en. Pasin pamuk i save nogutim narapela man. Long olgeta hap long nau ol sik bilong pamuk i go bikpela. Tasol sapos ol manmeri i no bin mekim pasin pamuk, ol i no inap kisim dispela kain sik. Sapos ol i no bin mekim ol kain kain pasin i gat sem, bai sik AIDS i no inap kamap strong.

Maski man i skul na em i gat bikpela save, tasol sapos poroman marit bilong em i bagarapim marit, bai em i bel hevi. Na maski em i mekim pasin pamuk wanpela taim tasol, bikpela hap taim i mas lus na bai poroman tru bilong em inap lusim tingting long dispela samting em i bin mekim.

Bikpela samting em olsem: Sapos man i no tingim gut marit bilong em, em i givim baksait long God. Baibel i tok: “Yupela ol marit i mas lukautim gut marit bilong yupela, bai em i stap klin tru long ai bilong God. Yupela i save, God bai i bekim pe nogut long ol manmeri i mekim ol kain kain pasin pamuk.”​—⁠Hibru 13:⁠4.

Olsem na man i gat save em bai bihainim tok bilong Sindaun 5:​18, olsem: “God i ken mekim gut long meri . . . bilong yu na yu ken amamas long em.” Man o meri i mas painim amamas wantaim poroman marit bilong em, na long dispela rot em i litimapim nem bilong Jehova, em As bilong marit.