Samting Bilong Helpim Man Long i Kam Bek

‘JISAS i givim ol tok piksa long ol.’ Dispela tok i kirapim 3-pela tok piksa Jisas i mekim long pasin marimari, olsem sipsip i lus, na mani i lus, na pikinini i lusim papa.​—⁠Luk 15:​3-32.

Wastaua bilong Epril 15, 1991 (tok Inglis) i skelim gut ol dispela tok piksa na i bin helpim planti man long save long rot bilong mekim pasin marimari long man i bin mekim rong long nau. Wastaua i mekim bikpela tok olsem ol elda inap go toktok wantaim rauspela man em ol i ting em inap tanim bel sapos ol i go lukim em long sampela taim​—⁠em nupela rot bilong helpim rauspela man. Olsem na wanem samting i bin kamap?

Wanpela man bilong provins Wosington, long Amerika, i salim pas i tok olsem: ‘Wastaua nau tasol mi kisim i kamapim klia olsem Jehova i Man bilong bikpela sori. Mi aiwara na bel i amamas tru long dispela nupela wok God Antap Tru i givim long ol elda. God bilong stretpela pasin, em tasol inap helpim ol dispela man i lus ol i gat pasin kain olsem sipsip. . . . Yes, mi rauspela man, tasol mi wok long mekim ol samting mi mas mekim na bai mi ken i kam bek.’ Long mun Oktoba, kongrigesen i kisim em bek.

Tasol olsem wanem taim tupela elda i go lukim rauspela man? Wanpela meri Kristen i raitim pas na tok: “Mi sot long sampela tok bilong kamapim ol samting mi pilim long bel bilong mi. Man bilong mi i raus pinis long kongrigesen inap 13 yia pinis, tasol ol elda i bihainim tok bilong dispela Wastaua na ol i kam lukim em. Asde long apinun em i go long miting​—⁠em namba wan taim em i bin mekim olsem inap planti yia pinis. Nau em i wok long stretim pasin bilong em bambai em inap kam bek.”

Taim ol wasman bilong raun i go lukim ol kongrigesen ol i lukim ol gutpela samting i kamap. Wanpela wasman sekit i tok olsem:

“Taim ol brata i kisim dispela Wastaua, planti ol i tingting planti olsem: Sapos ol elda i go toktok wantaim rauspela man, bai dispela i kirapim em long kam bek o olsem wanem? Nau yumi save pinis.

“Long laspela 4-pela kongrigesen mi bin go lukim, 9-pela manmeri i save kam gen long ol miting long Haus Kingdom. Kongrigesen i kisim bek wanpela tasol, em meri, tasol ol narapela 8-pela i wok strong long kam bek. Ol elda na ol kongrigesen ol i amamas long lukim hatwok bilong ol i karim gutpela kaikai, na ol i save ol i bin bihainim gutpela tingting taim ol i mekim ol samting em oganaisesen bilong God i makim.

“Mipela i amamas long dispela wok bilong pasin marimari ol elda inap mekim long man i bin mekim rong. Olsem dispela sista bipo em i raus, em i tok: ‘Mi pret long kam bek, long wanem, mi pilim olsem Jehova i no inap orait long mi. Tasol taim ol elda i kam lukim mi, dispela i strongim mi long kam bek.’ Pasin bilong em long givim bel tru long kam bek i bin strongim gut kongrigesen.”

Tru planti man ol elda i lukim ol i no laik tanim bel, tasol pasin marimari ol elda i mekim inap helpim sampela. Olsem na kirap long mun Septemba ol elda long olgeta wan wan kongrigesen bai tingim husat husat i rauspela man long teritori bilong ol na ol bai stretim rot bilong lukim ol man ol i ting i gat laik long kam bek na ol inap tanim bel sapos ol elda i mekim pasin marimari long ol.