Samting Yu Lukim Long Ai Em Inap Giamanim Yu
WANPELA man bilong raitim ol stori (Richard Sheridan) i tok: “Yumi no ken bilipim ol samting yumi lukim long ai.” Dispela tok i stret long ol diwai na ol manmeri tu.
Klostu long pinis bilong mun Mas, long yia 33, Jisas wantaim ol disaipel i wokabaut i go long Jerusalem na em i lukim wanpela diwai fik i gat planti lip. Tasol taim em i go klostu, em i no lukim wanpela kaikai i stap long en. Olsem na Jisas i tokim diwai: “Yu no ken karim kaikai moa na ol man i kaikai.”—Mak 11:12-14.
Mak 11:13 i tok, “em i no taim bilong ol diwai fik i karim kaikai,” olsem na i gat wanem as na Jisas i tok diwai i mas bagarap? As bilong dispela i olsem: Taim diwai fik i putim lip, long dispela taim yet em i save karim kaikai. Mun Mas i no taim bilong ol diwai fik i putim lip. Tasol ol lip i kamap pinis, olsem na Jisas i ting i mas i gat sampela kaikai tu. (Lukim piksa antap.) Sapos diwai i gat lip tasol na i no gat kaikai, dispela i makim olsem diwai i no inap karim kaikai. Samting man i lukim long kain diwai olsem, dispela inap giamanim em. Gavman i save putim takis long ol diwai bilong karim kaikai, olsem na sapos diwai i no karim kaikai, orait ol man i save katim—nogut ol i tromoi mani nating.
Jisas i mekim wok long dispela diwai fik i no gat kaikai bilong lainim ol disaipel long ol i mas bilip. Long de bihain ol disaipel i lukim diwai i drai pinis na ol i kirap nogut. Jisas i tok: “Yupela i mas bilip long God. . . . Sapos yupela i mekim prea na i beten long kisim wanpela samting, na sapos yupela i bilip tru olsem, yupela bai i kisim dispela samting, orait mi tokim yupela, dispela samting bai i kamap olsem yupela i tok.” (Mak 11:22-24) Jisas i lainim ol man long ol i mas bilip na beten, na tu, samting i painim diwai fik i makim samting i mas painim wanpela lain i no bilip.
Sampela mun bipo Jisas i bin tok, lain Juda i olsem wanpela diwai fik i no bin karim kaikai inap 3-pela yia na ol wokman bai katim sapos em i stap olsem tasol. (Luk 13:6-9) Fopela de paslain long taim Jisas i dai, em i bagarapim dispela diwai fik, na dispela i makim olsem lain Juda i no bin karim gutpela kaikai, olsem mekim ol wok i makim ol i tanim bel pinis, olsem na i stret ol i mas bagarap. Lain Juda ol i olsem dispela diwai fik—long ai i olsem ol i gutpela, tasol Jisas i lukim pasin bilong ol—ol i sot long bilip na ol i wok long sakim dispela Man God i makim bilong kisim bek ol man.—Luk 3:8, 9.
Taim Jisas i mekim Tok Long Maunten, em i tok ol man i mas lukaut long “ol giaman profet,” olsem: “Yupela lukim pasin bilong ol na bai yupela i save, ol i giaman profet, o nogat. . . . Olgeta gutpela diwai i save karim gutpela kaikai. Na diwai nogut i save karim kaikai nogut. Gutpela diwai em i no inap karim kaikai nogut. Na diwai nogut em i no inap karim gutpela kaikai. Olgeta diwai i no save karim gutpela kaikai, em ol i save katim na tromoi i go long paia. Olsem na yupela i mas lukim pasin bilong ol yet na bai yupela i save long ol giaman profet.” (Matyu 7:15-20) Dispela tok bilong Jisas na samting em i mekim long diwai fik i kamapim klia olsem yumi mas was gut long ol samting bilong lotu, long wanem, samting ai bilong yumi i lukim long lotu, em tu inap giamanim yumi.