“Olsem Wanpela Laion i Singaut Strong”
OLSEM WANEM? Yu bilip olsem Satan i stap? Long nau planti man i no bilip olsem—ol i ting dispela bilip olsem Satan i stap, i no stret wantaim ol save em ol man bilong saiens i kisim pinis. Long 1911, wanpela bikpela buk (Encyclopædia Britannica) i tok: ‘Ol man bilong saiens i bin kamapim tingting bilong ol long ol samting i save kirapim man long tingim na mekim ol samting—ol i no bilip olsem Satan i stap na em yet i kirapim ol man.’ Sampela tisa bilong lotu i ting Satan i no wanpela man tru—em i olsem wanpela mak tasol o wanpela stori nating. Narapela buk (The World Book Encyclopedia) i tok: ‘Planti tisa bilong lotu long nau ol i ting Satan i makim tasol ol pasin na tingting nogut i stap long bel bilong man.’
Orait, yumi laik save, Satan i stap tru o nogat? Sapos yu bilip long Baibel, yu mas bilip olsem Satan em i wanpela man tru. Jisas i bilip olsem Satan i stap, na em i tok em i “dispela hetman i save bosim dispela graun.” (Jon 14:30) Aposel Pol i tok, Satan “em giaman god bilong dispela graun.” (2 Korin 4:4) Na lapun aposel Jon i tok: “Dispela graun olgeta em i stap aninit long strong bilong Satan.”—1 Jon 5:19.
Sapos yu no wanbel wantaim dispela tok bilong Jon, orait, tingim ol samting i bin kamap long taim bilong yumi. Tingim ol lain bilong kilim man i dai na givim pen long man. Long nau ol pait i bin bagarapim planti man na kilim i dai ol lain bilong narapela skin. Yu tingim? Ol nius i kamapim kain kain pasin nogut olsem pasin bilong kilim i dai planti manmeri wantaim, na bagarapim meri, na mekim pasin sem long ol pikinini. Em nau, yumi save Satan tasol i stap god bilong dispela graun, a?
Aposel Pita i tokaut olsem: “Yupela i mas . . . was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai.” (1 Pita 5:8) Sapos wanpela laion i raun long hap bilong yu, yu ting bai yu lusim nating taim na toktok wantaim ol narapela na askim ol olsem: ‘Tru dispela laion i stap o . . . ?’ O bai yu ran i go hait?
Tru tumas, Satan i stap. Em i laik nogutim yumi—em i no sori liklik long yumi—na strong bilong em i winim bilong yumi. Olsem na ran i go hait long dispela Man em i strong moa yet. “Bikpela i olsem wanpela strongpela haus. Ol stretpela man i ken ran i go long en na i stap gut.” (Sindaun 18:10) Ran i go long God Jehova, na save olsem liklik taim na dispela man nogut, Satan, bai i no inap pulim ol manmeri moa long mekim pasin nogut. Bai yumi stap gutpela tru!—KTH 20:1-3.