Rot Bilong Kisim Save Long Ol Samting Bai Painim Wok Bisnis Long Bihain
WANPELA nius bilong Landon (Accountancy Age) i tok, strong bilong mani i go daun na ol man i gat wok long skelim ol samting bilong mani ol i no bin tokaut olsem long 1987 bikpela hevi bilong stok-maket bai kamap, olsem na nau planti man i no bilip long ol. Dispela samting i kirapim sampela bisnisman long go lukim ol man bilong lukluk long ol sta na bai ol inap save long wanem samting bai painim wok bisnis bilong ol long bihain. Long nau planti bikpela bisnisman i mekim dispela samting, olsem na ol dispela man bilong lukluk long ol sta i kisim bikpela mani tru.
Wanpela man bilong lukluk long ol sta i save skelim ol samting i bin painim wok bisnis insait long 30 yia wantaim wanem wanem hap ol bikpela sta i bin i stap long en, na em i tokaut long ol samting em i ting bai painim wok bisnis long bihain. Paslain long 1987, planti bisnisman i no bilipim tok bilong em, tasol nau ol i laik harim.
Narapela man i tingim de meri i karim pikinini na em i wokim ol piksa i makim pasin bilong man na wanem taim stret i gutpela bilong mekim ol samting bilong wok bisnis. Tasol narapela man i ting, samting i bosim wok bisnis bilong mani silva em wokabaut bilong mun.
Tasol i gat wanpela tokaut long ol samting i mas painim wok bisnis long bihain, na em bai kamap tru—tasol i no samting bilong lukluk long ol sta. Dispela tokaut i stap long Baibel na Jehova i as bilong en, em dispela God “i no save giaman.” (Taitus 1:2) Em i tokim Esekiel long tokaut olsem: “Ol bai i tromoi ol gol na silva [olsem mani] bilong ol long ol rot olsem pipia, long wanem, gol na silva i no inap helpim ol.”—Esekiel 7:19.
Dispela samting bai kamap long wanem taim? Em bai kamap long taim bilong “bikpela hevi tru,” em Jisas i bin tokaut long en, em Esekiel i kolim “taim Bikpela i belhat long ol.” (Matyu 24:21; Esekiel 7:19) Mani i no inap helpim man long abrusim bagarap, maski ol man bilong lukluk long ol sta i tok wanem. Yumi mas bilip long Jehova, em Man bilong helpim yumi, na long dispela rot tasol bai yumi inap abrusim bikpela bagarap taim olgeta pasin nogut bilong graun i pinis—olsem ol wok politik na lotu giaman na bikpela bisnis.—Sindaun 3:5, 6; Sefanaia 2:3; 2 Pita 2:9.