Em i Kirap Kwik

I GAT kain kain diwai bilong karim pikinini long hap bilong Mediterenian, tasol diwai bilong karim amon i narapela kain liklik. Long taim bilong kol ol diwai i olsem slip na malolo​—⁠no gat lip samting​—⁠tasol long laspela hap bilong mun Janueri o long mun Februeri, dispela diwai amon i olsem kirap long slip na putim ol nupela kru, na i paslain tru long ol narapela diwai. Olaman! Ol waitpela plaua i karamapim diwai olgeta na i olsem waitpela gras bilong ol lapun.​—⁠Lukim Saveman 12:⁠5.

Ol Hibru bilong bipo i givim nem olsem “kirap long slip” long diwai amon, em makim olsem em i kirap kwik long putim plaua. Jehova i stori long dispela samting bilong kamapim klia wanpela bikpela tok. Taim Jeremaia i kirap mekim wok bilong em, long wanpela driman samting em i lukim wanpela han bilong diwai amon. Dispela i makim wanem samting? Jehova i tokaut olsem: “Bai mi was gut long tok bilong mi bilong mekim em i kamap tru.”​—⁠Jeremaia 1:⁠12.

Ol diwai amon i save ‘kirap’ kwik, na olsem tasol Jehova i bin kirap kwik long salim ol profet i go toksave long lain bilong em olsem strafe bai painim ol, long wanem, ol i bin sakim tok bilong em. (Jeremaia 7:25) Na bai em i no malolo​—⁠bai em i “was gut” inap long tok profet bilong em i kamap tru. Olsem na long yia 607 paslain long Krais long taim God i makim pinis, strafe bilong Jehova i kisim lain Juda em ol i bin givim baksait long em.

Baibel i tok profet long wankain strafe bai painim ol man nogut bilong dispela taim bilong yumi. (Song 37:​9, 10; 2 Pita 3:​10-13) Profet Habakuk i stori long dispela strafe na em i toksave long yumi olsem: “Taim bilong ol dispela samting i mas kamap, em i no yet. . . . Yu ting bai em i no inap kamap kwik, tasol yu mas wet liklik na em bai i kamap.” (Habakuk 2:⁠3) Naispela plaua bilong diwai amon em inap kirapim yumi long tingim Jehova, em bai was gut long tok bilong em bilong mekim i kamap tru.

[Ol Piksa Kredit Lain long pes 32]

Pictorial Archive (Near Eastern History) Est.