Em i Kisim “Laip Olsem Prais”
APOSEL Jon i raitim tok i go long kongrigesen bilong Smerna, olsem: “Holim bilip, i go inap long taim yu dai, na bai mi givim yu laip olsem prais.” (KTH 2:8, 10) Mipela laik toksave, olsem: Frederick William Franz, presiden bilong Sosaiti Was Taua bilong Pensilvenia, na Sosaiti Wastaua bilong Nu Yok, em i dai long moningtaim long Disemba 22, 1992.
Dispela toksave em i samting bilong bel hevi, long wanem, dispela gutpela wokboi bilong Jehova, em planti manmeri ol i laikim em tumas, em i lusim wok bilong em long graun. Tasol em samting tu bilong amamas, long wanem tok bilong Kamapim Tok Hait 14:13 i stret long Brata Franz olsem: “ ‘Nau na olgeta taim bihain, ol manmeri i bilip long Bikpela na ol i dai, ol i ken amamas.’ Na Holi Spirit em tu i tok, ‘Ol i ken amamas tru, long wanem, ol i lusim dispela hatwok ol i bin mekim, na ol i ken malolo. Na ol i no i go nating. Nogat. Gutpela pasin ol i bin mekim, em i go wantaim ol.’ ” Brata Franz em i wanpela wokman bilong God i bin daunim em yet na em i bin wok strong long mekim bikpela wok. Em i bilong lain “wokboi i gat gutpela tingting” na God i bin mekim bikpela wok long em bilong helpim dispela lain long givim kaikai bilong spirit long “ol arapela wokboi” wantaim ol poroman bilong ol.—Matyu 24:45-47.
Mama i karim Brata Franz long Septemba 12, 1893, long Kovington, Kentaki. Em i kisim save long tok i tru long wanpela bikbrata bilong em. Long dispela taim, em i skul long Yunivesiti bilong Sinsinati—em i laik kamap wanpela pasto bilong lotu Presbitirian. Tasol em i no mekim—em i lusim Lotu Presbitirian na em i kirap long bung wantaim ol Baibel Stiuden, bihain ol i kisim nem olsem ol Witnes Bilong Jehova. Em i kisim baptais long Novemba 30, 1913, na long yia bihain em i lusim yunivesiti na kirap mekim wok colporteur (wok painia). Long Jun 1, 1920, em i kirap mekim wok long Bruklin Betel. I no longtaim na em i kisim wok bilong lukautim wok bilong ol colporteur, na long yia 1926 em i kisim nupela wok long dipatmen bilong rait—em i mekim bikpela wok long dispela dipatmen. Long yia 1945 em i kamap nambatu presiden bilong Sosaiti Was Taua na bilong sampela narapela sosaiti o asosiesen tu, em ol i helpim wok bilong dispela Sosaiti. Long yia 1977, presiden bilong Sosaiti long dispela taim, em Nathan H. Knorr, i dai, na Brata Franz i kamap presiden bilong Sosaiti Was Taua na em i holim dispela wok inap long taim em i dai. Insait long taim em i mekim wok bilong Jehova, em i bin lukim lain Witnes, pastaim ol i sampela tausen tasol, i go bikpela inap olsem 4 milion na hap. Em i bin kisim planti gutpela wok—em i bin mekim planti tok long ol kibung intenesenel na em i bin raun lukim ol brens-ofis na ol haus misineri long ol narapela narapela hap bilong graun. Stori bilong em i stap long Wastaua (tok Inglis) bilong Me 1, 1987.
Long Mande, Disemba 28, 1992, long apinun long Haus Kingdom bilong Bruklin Betel, ol i mekim wanpela tok bilong tingim em. Brata Albert D. Schroeder bilong Lain Bilong Bosim Ol Witnes em i mekim wanpela tok i strongim bel bilong ol brata. Ol lain bilong Betel long Wastaua Fam, na Pateson, na Maunten Fam, na Kingdom Fam, na lain bilong Betel long Kanada, ol tu i harim dispela tok long rot bilong telefon.
Yumi olgeta i sori em i lusim yumi, na ol brata sista i bin wok wantaim em ol i sori moa yet. Em i bin mekim pasin sori long olgeta brata sista i bin wok wantaim em na raun wantaim em—em i bin strongim ol na isi long ol. Tru tumas, ol wanbilip bilong em ol i bin tingim em olsem Hibru 13:7 i tok: “Yupela i mas tingting long ol lida bilong sios bilong yupela, bipo ol i autim tok
bilong God long yupela. Yupela i mas tingting long pasin ol i bin wokabaut long en, na yupela i mas bihainim pasin bilong bilip bilong ol.”
Long Disemba 30, 1992, ol i makim Brata Milton G. Henschel long kamap namba 5 presiden na kisim wok bilong Brata Franz.
[Ol Piksa long pes 31]
Frederick W. Franz long 1913
Long faktori bilong Sosaiti Mirtel Avenyu, 1920
Em wantaim Nathan H. Knorr, Yanki Stediam, 1953