Yu Redi Long Lusim Wanem Samting Bilong Kisim Dispela Samting?
OLSEM WANEM? Yu save long wanpela samting i gutpela tumas na yu redi long lusim olgeta samting bilong yu bambai yu inap kisim dispela samting? Jisas i bin save long wanpela samting olsem, na em i tokim ol disaipel long dispela samting.
Em i tok: “Kingdom bilong heven em i olsem wanpela bisnisman i wok long painim ol naispela naispela bis. Na taim em i lukim wanpela bis i gutpela tru, orait em i go salim olgeta samting bilong en na i go baim dispela gutpela bis.”—Matyu 13:45, 46.
Dispela bisnisman i redi long lusim olgeta samting bilong em bambai em inap kisim dispela “gutpela bis,” em Kingdom bilong God. Bilong wanem em i redi long mekim olsem? Long wanem, i no gat wanpela samting long graun i winim tru dispela samting. Kingdom bilong God tasol bai stretim olgeta hevi em man i no inap stretim, olsem pait, hangre, pasin raskol, pasin bilong mekim nogut long narapela. (Song 72:4-8, 13, 14) Na tu, Kingdom bai pinisim sin, na sik, na dai. (KTH 21:4, 5) Olsem na taim Jisas i lainim ol man long pasin bilong beten, em i makim namba tu samting man i ken askim God long en, olsem: “Kingdom bilong yu i mas i kam”!—Matyu 6:9, 10.
Yu redi long lusim wanem samting na bai yu inap kisim ol dispela gutpela samting bilong Kingdom? Ol dispela samting i no gat pe long en. Tasol bilong kisim, pastaim yu mas save, Kingdom em i wanem samting, na yu mas bilip olsem em i wanpela samting tru, na i mas i stap nambawan samting bilong yu. Olsem wanem? Yu inap mekim olsem? I gat sampela tok long Baibel em inap helpim yu. Gutpela sapos yu larim ol Witnes Bilong Jehova i helpim yu long kisim save long dispela Kingdom na olsem wanem dispela Kingdom inap helpim yu long nau.