Tru Em i Daunim Jona?

BAIBEL i tok, Jona i profet bilong Jehova, na sampela handet yia paslain long Jisas, Jona i lusim wok bilong em na i ranawe i go. Em i kalap long sip, tasol bikpela win na si i kirap, na boskru i tromoi Jona i go insait long solwara Mediterenian. Jehova “i salim wanpela traipela pis, na dispela pis i daunim Jona. Na Jona i stap long bel bilong pis inap tripela san na tripela nait.”​—⁠Jona 1:​3-17.

Sampela man i tok, ‘I no gat wanpela pis inap daunim man.’ Tasol spem weil o waitpela sak inap. Na wanpela buk bilong Disemba 1992 (National Geographic) i tok, weil sak tu inap. Em i bikpela tru, winim olgeta narapela sak. Em i longpela inap 20 mita, na hevi bilong en em 70 ton.

Buk i tok: ‘Jona inap i stap long bel bilong weil sak. Yumi ken tingim traipela maus bilong weil sak, em i pulim Jona i go insait. Maus bilong liklik weil sak em inap long tupela Jona wantaim i ken i go insait long en.’

Weil sak i save kaikai ol liklik liklik pis samting. Em i pulim ol i go insait long maus na i go daun long nek na i go long bel. Bel bilong en i olsem wanpela traipela rum. Tasol olsem wanem wanpela samting i ken lusim dispela rum na i kam ausait gen? Buk i tok:

“Sapos sak i pilim samting em i kaikai i bikpela na i no stret long bel, em i save traut. Bel i olsem bikpela bilum, na taim sak i laik traut em bilum i subim ol samting i kamap long maus na em i tromoi i go ausait, na sapos sak i trautim Jona olsem, skin bilong Jona bai wel, tasol em bai kisim save na tingting long dispela samting i bin painim em.”

Long nau i no gat weil sak long solwara Mediterenian, tasol ol i stap long ol hap bilong solwara inap long mak bilong Nu Yok. Olsem wanem? Ol i bin i stap long solwara Mediterenian long taim bilong Jona? Yumi no save, na Baibel i no kolim wanem kain pis Jehova i bin salim bilong daunim Jona, tasol Jisas i tok, stori bilong pis i daunim Jona i tru.​—⁠Matyu 12:​39, 40.

[Piksa Kredit Lain long pes 32]

Norbert Wu/Peter Arnold Inc.