Tru Yumi Mas Kisim Blut, o . . . ?

Long nau ol i save givim blut long planti sikman, tasol yu ting blut inap helpim tru man i gat sik olsem ol i tok?

Long wanpela buk (The American Journal of Medicine) bilong Februeri 1993, Dokta Craig S. Kitchens i askim olsem: “Blut Inap Helpim Tru Ol Man Olsem Ol i Tok, o Nogat?” Na em i tok, ol dokta i save skelim marasin ol i laik givim long sikman, em inap bagarapim em o nogat. Na olsem wanem long blut?

Kitchens i toktok long ripot i kamap long samting nogut em blut inap mekim long man, olsem givim sik hepataitas long em, na daunim strong bilong skin long sakim ol sik, na bagarapim sampela hap bilong bel, na nogutim skin na bai skin i sakim hap skin bilong narapela man ol i laik putim i go insait long man. Sampela dokta i skelim ol samting nogut inap kamap taim man i kisim blut, na ol i tok, ‘planti taim blut i nogutim man liklik, tasol sampela taim blut i bagarapim tru man’ na em i dai.

Yu ting i gutpela long kisim blut, maski em inap bagarapim yu?

Dokta Kitchens i lukim 16 ripot bilong 1,404 Witnes Bilong Jehova em dokta i katim ol na ol i no bin kisim blut, long wanem, ol i bihainim tok bilong Baibel i tok, mas klia long blut.​—⁠Aposel 15:​28, 29.

Orait, wanem samting i kamap? Dokta i tok, ‘Ol Witnes Bilong Jehova i sakim blut long taim dokta i laik katim ol, na dispela pasin bilong sakim blut inap bagarapim wan wan tasol. Yumi no save gut hamas man i abrusim bagarap taim ol i no kisim blut, tasol yumi save ol i planti, na ol man i bagarap taim ol i sakim blut, ol i no planti.’ I olsem dokta i tok, sapos ol sikman i kisim blut taim dokta i katim ol, sampela bai i bagarap, tasol sapos dokta i no givim blut long ol, i no planti olsem bai i bagarap.

Olsem na Kitchens i tok, ‘Ol Witnes i no kisim blut na i no planti i bagarap, olsem na ating i gutpela sapos ol dokta i no givim blut long planti sikman, a?’

Sapos ol man i tingim dispela samting na ol i sakim blut, ol i mekim samting i stret long lo bilong dispela Man i bin wokim yumi.