Nem Bilong God

“Sapos Jehova i no wokim haus, ol kamda i wok nating.” Wanpela rait Latin i tok olsem. Ol i kisim dispela tok long Song 127:⁠1. Em i tok stret, long wanem, maski ol man i mekim wanem, sapos Jehova i no orait long en, wok bilong ol bai lus nating.

Dispela rait Latin i bilong 1780 na i stap long banis bilong wanpela haus long Kolombo long Sri Lanka, na i gat nem bilong God Jehova long en. (Lukim piksa.) Sampela handet yia paslain long 1780 ol man i bin kolim dispela nem. Ol i bin raitim long ol haus, na haus lotu, na mani tu. Ol misineri i bin kolim dispela nem bilong God taim ol i go long ol narapela kantri, na ating ol i bin kam long Sri Lanka, olsem na nau dispela nem i stap long hia tu.

Tasol long nau ol man i no tingim nem bilong God, maski ol i tok ol i Kristen. Sampela i gat tok long ol Witnes Bilong Jehova, long wanem ol i save kolim nem bilong God. Sampela i tok, long nau yumi no save ol Hibru i bin kolim olsem wanem. Tasol yumi no save tu ol Hibru i bin kolim nem Jisas olsem wanem, tasol ol man i save kolim nem Jisas, a?

Nem bilong God i bikpela samting tru long Jisas. Em i lainim yumi long beten olsem: “Nem bilong yu i mas i stap holi.” (Matyu 6:⁠9) Na klostu long taim ol i kilim em i dai em i tok: “Mi autim pinis nem bilong yu long ol man.” (Jon 17:⁠6) Ol Kristen tru i bihainim lek bilong Jisas. Orait, ol tu i mas ‘autim nem bilong God’ long ol man, a? Ol Witnes Bilong Jehova i save kamapim nem bilong Jehova long ol man, na em i mekim gut “haus” bilong ol. Wanpela tok bilong Song long Baibel i kamap tru long ol, em i tok: “Ol manmeri i putim [Jehova] i stap God bilong ol, ol tu i ken amamas.”​—⁠Song 144:⁠15.