Go Long Heven o Long Helpaia?

“OLSEM WANEM? Yu ting bihain bai yu go long heven? O bai yu go long helpaia?”

Wanpela lain i bin askim sampela long Amerika olsem, na wanpela dipatmen bilong skelim lotu long Yunivesiti Prinston i raitim bekim bilong ol long wanpela nius (Religion in America 1992-1993).

Sapos ol i askim yu, bai yu tok wanem? Yu ting poroman marit bilong yu o ol narapela long famili inap go long heven taim ol i dai? O yu ting yu na ol tu bai go long helpaia?

Taim ol i askim ol man olsem, 78 pesen i tok, ol i ting ol inap i go long heven; tasol 40 yia bipo planti man i no ting olsem. Na olsem wanem long helpaia? Inap 77 pesen i tok, ol i ting ol i no ken i go long helpaia.

Yu ting Baibel i as bilong dispela tingting bilong ol? Sampela i tok, inap faipela yia samting bipo ol i save go planti taim long lotu, tasol nau i no tumas. Inap 28 pesen tasol i tok, ol i save stadi long Baibel, na 27 pesen i skul long ol samting bilong lotu.

Sapos yu skelim gut tok bilong Baibel bai yu save, Baibel i tok, taim Jisas i dai em i go “long ples bilong ol man i dai pinis,” olsem “long matmat.” (Aposel 2:31) Na King Devit na Jon Bilong Baptais i no bin go long heven. (Matyu 11:11; Aposel 2:29) Dispela em trupela tok, na tingting bilong ol man i no as bilong en.

Na Baibel i tok, ol aposel bilong Jisas na sampela liklik lain moa ol tasol i bilong i go long heven na mekim wok king wantaim Jisas, na ol narapela man i dai pinis ol i go long matmat na wetim taim bilong God i kirapim bek ol, na ol inap i stap amamas na i stap oltaim long graun long gutpela paradais.

Ol Witnes Bilong Jehova bai amamas long helpim yu long kisim ol gutpela tok long Baibel bilong yu na bai yu ken save long ol gutpela samting bai kamap bihain.