Ol i Wokim Long Wankain Taim Inap Tenpela Yia!

INAP 10-pela yia bipo ol i kirap wokim Wastaua long tok Spen na tok Inglis long wankain taim. Long nau ol i askim wanpela gutpela sista bilong Spen em i bin ting olsem wanem long dispela samting. Em i tok, ‘Em wanpela blesing, long wanem, nau mipela i wankain olsem tok Inglis. Taim mi tok, “olsem tok Inglis,” mi tingim oganaisesen bilong Jehova. Mipela i save kolim oganaisesen olsem “Mama,” long wanem, mipela i pas tru wantaim em. Dispela em gutpela tru! Nambawan!’

Dispela gutpela sista i kamapim tingting bilong planti manmeri i no save kaunim tok Inglis. Bipo, ol tok bilong Wastaua i save kamap long tok Spen inap 6-pela mun bihain long tok Inglis. Na i wankain long planti narapela tok ples. Olsem na ol brata i laik tru bai wankain tok i kamap long wankain taim long planti tok ples.

Kirap long Wastaua bilong Epril 1, 1984, ol i wokim Wastaua long tok Spen na tok Inglis long wankain taim. Bihain ol i mekim olsem long sampela tok ples moa. Long kirap bilong 1985, ol i wokim long 23 tok ples long wankain taim. Ol i kisim ol man bilong tanim tok na lainim ol, na nau ol inap wokim olsem long planti tok ples moa.

Taim ol i wokim dispela Wastaua, ol i bin wokim ol Wastaua long wankain taim inap 10-pela yia pinis. Ol i wokim Wastaua long 116 tok ples, na ol i wokim long wankain taim long 85 bilong ol dispela tok ples. Olsem na taim ol i wokim wanpela Wastaua, em ol i save wokim 16,100,000, klostu olgeta (99.3 pesen) i gat wankain piksa long skin na wankain tok insait. Na long olgeta man i go long Stadi Wastaua long olgeta wik, bikpela hap lain tru (95 pesen) ol i stadi long wankain tok long wankain taim.

Nius Kirap! tu ol i save wokim wantaim long 37 tok ples bilong ol 74 tok ples bilong en. Na ol i wokim Yearbook long 18 tok ples. Dispela pasin bilong wokim ol buk na nius wantaim long kain kain tok ples i helpim lain bilong God long i stap wanlain tru “long wankain tingting na wankain laik.”​—⁠1 Korin 1:⁠10.