“Ol Witnes Bilong Jehova i Lukautim Mi!”
NAU long taim bilong las de, planti man “i pait na bagarapim ol man nabaut.” (2 Timoti 3:1, 3) Isaac em wanpela wokman bilong God long wanpela brens-ofis bilong Sosaiti Was Taua long Wes Afrika na em i save long dispela samting. Em i stori olsem:
“Long Janueri 1992, mi stap long teksi wantaim 5-pela narapela manmeri na mipela i raun long rot long ples i no gat man. Mi kirap long autim tok long meri i sindaun klostu long mi, na em i amamas long kisim wanpela nius bilong Baibel mi givim long em.
“Long 4 klok samting long apinun, wantu wanpela nupela ka i no gat namba-plet em i spit i kam katim rot long poret bilong teksi na draiva bilong teksi i krungutim strong brek. Tripela strongpela man i gat gan i lusim ka na i kam opim ol dua bilong teksi. Wanpela i singaut strong na i tok, ‘Yupela olgeta, lusim teksi.’
“Narapela i pulim paus long han bilong mi i gat ol Baibel na buk bilong Baibel long en. Taim em i lukim dispela samting tasol i stap long paus, em i tromoi paus na em i tok: ‘Yu gat wanem samting moa?’ Kwiktaim mi givim olgeta mani long paus mani bilong mi long em. Em i kisim na em i tok: ‘Em tasol?’ Mi tokim em, mi wanpela Witnes Bilong Jehova na ol Witnes i no save giaman. Em i pulim paus mani long han bilong mi na em i lukim kat i makim mi bilong Sosaiti Was Taua, na em i tok, ‘Oke, Wastaua, yu wet hia.’
“Nau em i go long dispela meri mi bin autim tok long em. Kwiktaim meri i rausim bis long nek na givim long em na em i givim olgeta mani bilong em long em. Taim dispela raskol i lukim nius i stap long han bilong meri, em i ting dispela meri tu em i wanpela Witnes, olsem na em i makim olsem meri i mas stap wantaim mi.
“Ol i wok long paitim ol narapela i bin stap wantaim mipela long teksi. Ol i paitim nogut draiva na narapela man i raun wantaim mipela, na stilim ol samting bilong ol. Wanpela raskol i laik pulim bis long nek bilong namba 2 meri i raun wantaim mipela, tasol meri i laik sakim raskol na ol i holim gan na paitim em nogut long en long het na long bros inap long em i dai olgeta. Namba 3 meri ol i pulim em i kam ausait long teksi na sutim em long bros. Tarangu! Em tu i dai. Mi wantaim dispela yangpela meri i stap wantaim mi, mitupela tasol i no bagarap.
“Bihain wanpela ka i kam long rot na kisim mipela, na dispela meri i guria yet, em i tokim ol olsem: ‘Ol Witnes Bilong Jehova i lukautim mi na mi no bagarap!’ ”