Ol Pati Bilong Betde i Bin Kamapim Dai

PLANTI man long nau i ting, i no gat rong long pasin bilong wokim pati samting na amamas long de mama i bin karim man. Tasol stori bilong Baibel i no orait long dispela pasin. No gat wanpela taim Baibel i stori long wanpela gutpela wokboi bilong Jehova i wokim pati bilong betde.

Baibel i stori long tupela pati bilong betde tasol na ol i bilong tupela bikman i birua long God. Long dispela tupela pati ol i bin kilim man i dai, bambai ol man long pati i ken amamas long lukim wanpela man king i kros long em, em i dai. Long namba wan pati, king bilong Isip i kilim i dai bos bilong haus bret. (Stat 40:​2, 3, 20, 22) King i kilim em long pati, long wanem, em i kros long em. Long namba 2 pati, pamukman Herot, em namba wan gavman bilong Galili, em i katim nek bilong Jon Bilong Baptais bilong truim promis em i bin mekim long yangpela meri i danis long pati na Herot i amamas long en. Em pasin nogut tru, a?​—⁠Matyu 14:​6-11.

Tasol ating Baibel i stori long tupela pati bilong betde i narapela kain? Nogat. Josifas, em man bilong raitim stori bilong ol Juda long bipo, em i kamapim klia dispela samting. Em i stori long ol narapela taim ol i bin kilim man i dai long pati bilong betde.

Olsem: Taim ol Rom i bagarapim Jerusalem long yia 70, ol i kilim i dai 1,000,000 Juda na kisim 97,000 i go kalabus long Rom. Long rot, kepten bilong ami bilong Rom, em Taitus, em i kisim ol dispela kalabus i go long biktaun i stap long nambis klostu, em Sisaria.

Josifas i tok: “Taim Taitus i stap long Sisaria, em i wokim bikpela amamas bilong tingim betde bilong brata bilong em, Domisian, na em i kilim i dai 2,500 kalabus. Em i tromoi ol i go long ol wel abus na long paia bambai ol man i ken amamas long lukim. Bihain em i go long Beritus [Berut], em ples ol Rom i sindaun long en long Fonisia. Taim em i stap hia, em i kilim planti kalabus moa olsem bikpela so bilong amamas long betde bilong papa bilong em.”​—⁠The Jewish War, 7, 37, em Paul L. Maier i tanim tok bilong en long buk Josephus: The Essential Writings.

Olsem na yumi no kirap nogut long wanpela buk i tok: “Ol Hibru bilong bihain i tingim ol amamas bilong betde em hap pasin bilong lotuim god giaman. Ol samting ol i lukim ol man i mekim long ol pati bilong betde long dispela taim bipo i strongim dispela tingting bilong ol.”​—⁠The Imperial Bible-Dictionary.

Ol gutpela Kristen long taim bilong ol aposel i no laik insait long dispela pasin em Baibel i no orait long en na ol Rom i wokim ol amamas nogut tru long en. Ol Kristen bilong nau i bilip tru ol i save, ol stori bilong betde long Baibel i bilong skulim ol. (Rom 15:⁠4) Ol i klia long ol pasin bilong amamas long betde, long wanem, olkain pati samting olsem i litimapim nem bilong man. Na bikpela samting, ol wokboi bilong Jehova i tingim stori bilong Baibel i no orait long dispela.

[Piksa long pes 25]

Stediam long Sisaria