Rop Bilong Diwai “Ol Man i No Inap Kamautim”
SAMTING i bikpela tru na i stap longtaim, winim planti narapela samting, em ol diwai sekoia bilong Kalifonia. Taim ol i bikpela pinis, ol inap go antap inap 90 mita na i stap 3,000 yia.
Taim yumi lukim wanpela diwai sekoia, yumi kirap nogut, tasol sapos yumi inap lukim ol rop bilong en, bai yumi kirap nogut moa yet. Ol rop bilong en i save go nabaut insait long graun na karamapim bikpela hap tru (1.2-1.6 hekta) olsem mat. Ol dispela rop i olsem anka; ol i mekim na diwai i sanap strong, maski bikpela tait wara o strongpela win o bikpela guria i sakim nabaut!
King Solomon i stori long ol strongpela rop bilong diwai na em i tok piksa olsem: “Sapos man i mekim pasin nogut, dispela i no inap helpim em long sindaun gut na i stap strong. Tasol man i bihainim stretpela pasin, em i olsem diwai i gat rop i go daun tru na ol man i no inap kamautim.” (Sindaun 12:3) Tru tumas, ol man nogut i no inap i stap strong. I olsem ol i sindaun gut, tasol em bilong liklik taim tasol. Jehova i tok promis olsem: “Ol man nogut i wet nating. Ol i no inap lukim gutpela taim.”—Sindaun 10:28.
Dispela i givim toksave long ol man i tok ol i Kristen, long wanem, Jisas i tok sampela bai i olsem “i no gat rop,” na bai ol i pundaun. (Matyu 13:21) Na aposel Pol i stori long ol man em ol tok giaman i ‘sakim ol nabaut.’ (Efesus 4:14) Yumi ken mekim wanem na bai dispela i no painim yumi?
Ol rop bilong diwai sekoia i save go nabaut insait long graun na pulim gris bilong graun. Olsem tasol yumi mas larim bel na tingting bilong yumi i go insait tru long Baibel bilong kisim save long ol tok bilong en, em olsem wara bilong givim laip. Olsem bai bilip bilong yumi i kamap olsem diwai em rop bilong en i go daun tru. Tru, traim na hevi bai painim yumi, olsem strongpela win i laik sakim yumi, na ating bai yumi guria liklik, olsem diwai. Tasol sapos bilip bilong yumi i gat strongpela as, bai yumi sanap strong olsem wanpela diwai, em rop bilong en i go daun tru na “ol man i no inap kamautim.”—Lukim Hibru 6:19.