Bilong Wanem Ol Man Nogut i Stap Gutpela?
“BILONG wanem God i save larim ol man bilong mekim pasin nogut na ol i stap gut na kamap lapun?” Bipo tru gutpela man Jop i bin kamapim dispela askim, na kirap long dispela taim i kam inap long nau planti man moa i kamapim kain askim olsem. Ating dispela askim i stap tu long tingting bilong planti man bilong ol hap bipo Yugoslavia i bosim (olsem meri i stap long namba wan pes bilong skin bilong dispela nius), em ol i sori long ol man i karim hevi na pen long wanpela pait nogut. Bilong wanem ol man nogut i abrusim bagarap na ol i no sot long wanpela samting? Olsem Jop i tok, planti taim “ol famili bilong ol dispela man nogut i save sindaun gut long haus bilong ol, na i no gat wanpela samting i mekim ol i pret. Na God tu i no mekim save long ol.”—Jop 21:7, 9.
Olsem wanem? Dispela i kamapim olsem em i no bikpela samting na yumi mekim wok bilong God, na yumi laikim tru ol narapela man, na yumi no mekim pasin nogut? Nogat tru! Baibel i givim stretpela tingting long yumi taim em i tok: “Yu no ken wari long pasin ol man nogut i save mekim. Yu no ken bel nogut long ol samting bilong ol man i save mekim pasin nogut. Liklik taim tasol na bai ol man nogut i bagarap, olsem gras i save drai, na olsem lip bilong diwai i drai. Yu mas bilip tru long God, na mekim gutpela pasin.”—Song 37:1-3.
Tru tumas, gutpela sindaun bilong ol man nogut i bilong sotpela taim tasol. Ol bai no inap stap longpela taim, tasol ol man i mekim wok bilong God, gutpela samting bai painim ol long bihain. I no longtaim na tok promis bilong God bai kamap tru, olsem: “Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:4) Ol stretpela man tasol bai stap na lukim dispela samting—ol man nogut nogat. Dispela i kirapim yumi long stap gut long God na kisim save long laik bilong em, maski ol man i stap klostu i mekim pasin nogut!
Sapos yu laik kisim sampela save moa, o yu laik bai wanpela i kam lukim yu long haus na lainim yu long ol tok bilong Baibel, no gat pe, orait raitim pas long IBSA, Box 636, Boroko, N.C.D., Papua New Guinea, o lukim atres long pes 2 em i stret long yu.