“Em Pasin Bilong Ol Kristen Tru”

LONG buk bilong em bilong 1990, Arbeit macht tot​—⁠Eine Jugend in Auschwitz (Wok i Kilim Yu i Dai​—⁠Ol Yangpela Man Long Auswis), Tibor Wohl, em wanpela man i no bin bagarap long Auswis, em i stori long wanpela tok bilong tupela kalabusman em i bin harim. Wanpela man, em bilong Ostria, em i tok em i no bilip long God. Tasol em i litimapim nem bilong sampela kalabusman i gat retpela mak​—⁠em ol Sumatin Bilong Baibel, long kem ol i kolim ol Witnes Bilong Jehova olsem.

Man Ostria i tokim poroman bilong em olsem: “Ol i no save insait long pait. Maski narapela man bai kilim ol i dai, ol i no inap kilim narapela i dai. Long tingting bilong mi, dispela em pasin bilong ol Kristen tru. Mi mas stori long yu long wanpela gutpela samting ol i bin mekim. Mipela i stap wantaim ol Juda na ol Sumatin Bilong Baibel long wanpela hap bilong kem long Stuthof. Long dispela taim ol Sumatin Bilong Baibel i mas mekim ol hevipela wok ausait na i kol nogut tru. Mipela i no save olsem wanem ol i no bagarap. Ol i tok, Jehova i givim strong long ol. Ol i mas kaikai bret bilong ol, long wanem, ol i hangre nogut tru. Tasol ol i mekim wanem? Ol i bungim olgeta bret bilong ol na kaikai hap na givim hap long ol brata bilong ol, em ol brata bilong ol long spirit, em ol i kam long ol narapela kem na ol i hangre nogut tru. Ol i tok amamas long ol na givim kis long ol. Paslain long ol i kaikai, ol i beten na bihain ol i amamas na pes bilong ol i lait tru. Ol i tok, i no gat wanpela i hangre moa. Olsem na mi tingting, ‘Ol i Kristen tru.’ Oltaim mi bin ting ol Kristen i mas i gat kain pasin olsem. Sapos yumi bin mekim pasin olsem long ol poroman bilong yumi hia long Auswis, em ol i hangre nogut tru, em bai gutpela tru!”