Tok Bilong Ol i Helpim Bilip

KLOSTU long yia 1900 ol samting bilong saiens na ol save bilong graun na ol wok bisnis samting i daunim tru bilip bilong ol man, na planti ol i no bilip moa long God na long spirit holi bilong em i bin kamapim ol tok bilong Baibel.

Tasol i no ol dispela lain tasol i kamapim tingting bilong ol. Sampela lain moa i mekim olsem. Planti saveman i lukim olsem i gat planti samting bilong helpim bilip olsem God i stap, na i no helpim bilip olsem i no gat God. Na ol save ol i kisim i kamapim planti samting i makim olsem Baibel em i Tok Bilong God.

Wanpela man i tokaut strong long dispela em C. T. Russell. Planti milion manmeri i bin kaunim wanpela buk em i bin wokim long 1886 (The Divine Plan of the Ages). I gat sampela strongpela tok long wanpela sapta bilong en, het-tok bilong sapta, “I Gat As na Yumi Ken Bilip Olsem Wanpela Bikpela Man Bilong Wokim Olgeta Samting Em i Stap” (The Existence of a Supreme Intelligent Creator Established).

Bihain Russell i raitim tok long ol nius na buk samting i kamapim sampela strongpela as na yumi ken bilip long God na long Baibel. Sosaiti Was Taua i bin wokim ol dispela nius na buk samting. Namba tu presiden bilong Sosaiti Was Taua, em J. F. Rutherford, i raitim buk Creation (1927) na sampela buk moa i helpim dispela bilip olsem God i stap.

Long nau dispela sosaiti i wokim sampela buk samting i gat sampela save moa bilong dispela samting. Yu inap kisim long ol Witnes Bilong Jehova na bai yu ken kaunim na tingim gut ol dispela tok.

Sapos yu laik kisim sampela save moa, o yu laik bai wanpela i kam lukim yu long haus na lainim yu long ol tok bilong Baibel, no gat pe, orait raitim pas long IBSA, Box 636, Boroko, N.C.D., Papua New Guinea, o lukim atres long pes 2 em i stret long yu.