“Maketim Sol” Long Mosambik
FRANCISCO COANA, em wanpela brata bilong komiti i lukautim wok bilong ol Witnes long kantri Mosambik. Em i bin stap inap 10-pela yia long ol banis kalabus nogut ol i bin kalabusim ol Witnes long en bilong “senisim tingting” bilong ol. Em i stori olsem: “Mi save mipela bai i stap kalabus longtaim liklik, na mi tokim wasman sekit mi laik mekim yet wok painia oltaim. Tasol olsem wanem mi inap winim mak bilong ol aua, long wanem, klostu olgeta man long banis kalabus ol i Witnes Bilong Jehova. Mi tokim em mi bai go autim tok long taun Milans, i stap longwe inap 47 kilomita.
“Ol bikman i tok mipela i no ken lusim banis kalabus, tasol ol i no strong tumas long bihainim dispela lo. Mi go long bus na brukim skru na beten askim Jehova long opim rot bambai mi inap autim tok long ol manmeri bilong dispela hap. I no longtaim na Jehova i opim rot.
“Mi bungim wanpela man i gat wilwil na mi pasim tok wantaim em olsem mi bai lukautim gaden bilong em (klostu wanpela hekta) taim bikpela ren i no kam yet, na em bai givim wilwil bilong em long mi, olsem pe bilong mi. Olsem na long olgeta de, long moningtaim, mi wok long gaden bilong em. Jehova i mekim gut long mi na mi kisim wilwil.
“Nau mi gat rot bilong i go long bikpela taun Milans na mekim gut wok painia bilong mi. I gat tambu long wok bilong mipela, olsem na mi painim rot bilong helpim ol man long save long tok i tru. Mi putim ol buk na nius insait long siot bilong mi, na mi pulimapim sol long wanpela bek na mi raun maketim sol. Pe bilong sol em 5 metekis, tasol mi putim pe i go antap inap 15 metekis. (Sapos mi askim liklik pe tasol bai ol man i baim kwiktaim na bai sol i pinis na mi no gat rot bilong autim tok!) Mi save toktok wantaim man olsem:
“ ‘Gude! Mi maketim sol.’
“ ‘Pe hamas?’
“ ‘Fiftin metekis.’
“ ‘Nogat. Nogat. Em bikpela pe tumas!’
“ ‘Yu tok stret. Em bikpela pe tumas. Tasol yu mas save, liklik taim na bai pe bilong en i go antap moa yet. Baibel i tok olsem. Yu save long dispela?’
“ ‘Mi no lukim dispela tok long Baibel bilong mi.’
“ ‘Tasol em i stap. Kisim Baibel bilong yu i kam na bai mi soim dispela tok long yu.’
“Bihain mi inap toktok wantaim em long Baibel bilong em, na mi no ken kamautim Baibel bilong mi i stap insait long siot. Mi save stori long Kamapim Tok Hait sapta 6, i tok long ol hevi bai kamap na kaikai bai sot. Sapos mi pilim olsem man i laikim dispela tok, mi kamautim wanpela buk Tok i Tru i Bringim Man i Go Long Laip Oltaim o buk Good News to Make You Happy na kirapim Baibel-stadi.
“Long dispela rot mi bin kirapim wanpela grup long Milans, i gat 15 manmeri i laik harim tok. Tasol i no longtaim na ol gavman i kisim save long wok mipela i mekim. Wanpela taim mi stadi wantaim wanpela famili na wantu polis i kam insait long haus na holim mipela. Ol i kisim mi wantaim dispela famili olgeta, ol liklik pikinini tu, na bringim mipela i go long haus kalabus. Mipela i stap wanpela mun long kalabus na bihain ol i salim mipela olgeta i go bek gen long banis kalabus.”
Ol dispela samting i painim ol brata bilong yumi i no daunim strongpela laik bilong ol long mekim wok bilong Jehova. Nogat. Nau Francisco wantaim famili bilong em na planti tausen brata sista moa bipo ol i stap long ol dispela banis kalabus, ol inap lotu long Jehova na autim tok long Mosambik, no gat tambu.