Mani Ol i Raitim Nem Bilong God Long En

LUKIM gut ol dispela mani silva ol i soim long hia. King bilong Jemani, em Wilhelm Namba 5, em i bin wokim long taim em i king long 1627 i go inap long 1637. Long dispela taim, Pait Bilong 30 Yia i stap long hap bilong sentral Yurop, em pait namel long ol Katolik na Talatala. King Wilhelm Namba 5 i helpim lain Talatala. Bilong baim bikpela pe bilong dispela pait, em i kisim olgeta silva bilong em na wokim mani long en.

Piksa long planti mani i soim san i raunim nem bilong God, Jehova, ol i raitim long 4-pela leta long tok Hibru ol i kolim Tetragramaton. Na ol i wokim tu wanpela diwai pam, na dispela i makim strong. Win i mekim na diwai i slip liklik, em i no bruk, long wanem, God i lukautim. Rait long tok Latin i stap long mani i gat nem Jehova long en, na i tokaut long bilip bilong ol man long Jehova i save lukautim ol.

Maski ol i raitim nem bilong God long mani bilong ol, dispela i no bin helpim ol, long wanem, long taim bilong pait Jehova i no save helpim wanpela lain. Tru tumas, God i no bin orait long Pait Bilong 30 Yia. Buk Funk & Wagnalls New Encyclopedia i tok: “Long olgeta wan handet wan handet man Jemani, 50 samting i bin dai long taim bilong pait. Planti biktaun, liklik ples, fam bilong Jemani i bin bagarap olgeta. Na 60 pesen samting bilong ol faktori, fam, na bisnis bilong Jemani i bin bagarap.”

Ol i bin raitim nem bilong Jehova long ol dispela mani na yumi tingim tok Jehova i bin givim long ol Israel: “Yupela i no ken kolim nating nem bilong mi God.” (Kisim Bek 20:⁠7) Tasol, ol dispela mani i kamapim olsem, inap longtaim ol man long Jemani i save long nem bilong God, Jehova. Yu save gut long God i holim dispela nem?