Ol i Skelim Gen Pasin Bilong Givim Blut Long Man

LONG nau sik AIDS i save painim planti man, tasol wanpela rot bilong ol man i ken kisim dispela sik, ating em long haus sik, long rum bilong katim man. Dokta Richard Spence i tok: “I no gat rot bilong mipela i ken klinim gut blut na bai i no gat wanpela jem i stap, nogat.” Winim 10-pela yia pinis, dispela dokta i bin bosim wanpela medikal-senta bilong katim man na ol i no save givim blut (Cooper Hospital-University Medical Center, Kamden, Nu Jesi, Amerika).

Olsem na planti Witnes Bilong Jehova i gat sik ol i save go long dispela medikal-senta. Ol Witnes i bihainim lo bilong Baibel long blut na ol i no save kisim blut​—⁠planti man i save long dispela samting. (Wok Pris 17:11; Aposel 15:​28, 29) Tasol planti sikman ol i no Witnes, ol tu ol i kam long dispela senta, long wanem, ol i pret long kisim sampela sik long rot bilong blut, olsem sik hepataitas na AIDS. Wanpela nius (Courier-Post Weekly Report on Science and Medicine) i tok: “Sik AIDS i go bikpela na dispela i kamapim klia olsem mipela i mas glasim gut blut.” Nius i tok moa: ‘Tasol maski mipela i glasim gut blut, sampela taim jem bilong sik AIDS i hait i stap long blut​—⁠i no save kamap ples klia hariap.’

I gat ol dispela samting nogut, olsem na dispela senta i mekim wok long sampela narapela samting; blut nogat. Olsem: Ol i save putim hap blut bilong sikman i go bek long em​—⁠sampela Witnes i no orait long sampela rot bilong mekim dispela wok.a Na ol i mekim wok long ol drak bilong helpim blut bilong sikman i kamap bikpela hariap. Na tu, ol i mekim wok long samting olsem senis bilong blut bilong helpim oksijen long raun gut long ol rop bilong blut. Dokta Spence i tok: “Ol Witnes Bilong Jehova ol i laik kisim gutpela marasin tru bilong oraitim ol, tasol ol i laikim ol samting i no gat blut long en.”

Ol Witnes Bilong Jehova ol i tenkyu long ol dokta i bin wok gut wantaim ol na helpim ol, em ol dokta i bin tingim gut bilip bilong ol. Olsem na ol Witnes i bin kisim “gutpela marasin tru” na bel bilong ol i stap klin yet long ai bilong God Jehova.​—⁠2 Timoti 1:⁠3.

[Ol Futnot]