‘Sapos Olgeta Man i Kain Olsem Ol, Em Bai Gutpela!’

Dispela em i tok bilong wanpela niusman i kamap long nius (Letzebuerger Journal) bilong Laksambek. Em i toktok long husat?

Em i bin i go long Polan bilong lukim wanpela bung bilong makim namba 50 yia ol i bin rausim ol Jeman long Auswis, na em i lukim olsem ol i no bin kamapim nem bilong wanpela lain i bin kisim bikpela pen na hevi moa long dispela ples. Long stori bilong em long nius bilong Februeri 2, 1995, em i tokaut olsem dispela lain em ol Witnes Bilong Jehova. Em i tok: “Maski ol i stap nogut tru long ples bilong wetim kot o long banis kalabus, o ol inap i dai long bikpela hangre, o ol lain bai katim nek bilong ol long akis samting, dispela i no inap mekim ol i lusim bilip.” Na em i tok moa: “Ol lain SS [wanpela lain polis bilong Hitler] ol i save mekim nogut tru long ol man, tasol ol tu i kirap nogut long lukim ol Witnes i gat strongpela bel tru, na taim ol i mas i dai ol i no pret.”

Ol Witnes Bilong Jehova i no gat laik long i dai olsem man bilong holimpas bilip. Tasol olsem ol Kristen bilong pastaim i bin mekim, planti tausen bilong ol i dai, long wanem, ol i no laik brukim ol lo Kristen. Dispela bilip bilong ol i kamapim klia olsem ol i narapela kain tru long ol narapela lain long dispela taim nogut bilong gavman bilong Hitler.

Na bilong pinisim dispela tok, niusman i tok: “Sapos olgeta man i kain olsem ol Witnes Bilong Jehova, em bai gutpela!” Sapos olsem, bai dispela Namba 2 Pait i no inap kamap.