Wanpela Pasin Nating Bilong Lotu?
INAP planti handet yia pinis ol Katolik i save mekim konpesio, olsem autim sin bilong ol. Tasol planti ol i ting em i wanpela pasin nating bilong lotu. Nambawan tisa bilong wanpela haiskul, nem bilong em Bob, em i tingim taim em i yangpela yet na em i tok: “Maski mi yangpela yet, mi no bilip tumas long en.” Bilong wanem? Long wanem, long tingting bilong em, konpesio em i kamap olsem wanpela pasin nating bilong lotu. Em i tok: “Konpesio i olsem yumi kisim ol switkes samting i go long man bilong kastam long ples balus, na ol sin i pulap long switkes. Man ya i askim yu long ol sin bilong yu, na taim yu givim pinis sampela mani long em olsem takis bilong ol samting yu bin baim long narapela kantri, em i larim yu i go ausait.”
Na Frank Wessling i raitim wanpela tok long nius (U.S. Catholic) i tok, ‘konpesio i olsem yumi autim ol wan wan sin bilong yumi i go i go na yumi mekim ol beten bilong tanim bel em yumi lain pinis long kolim nating, na bihain yumi mekim nating wanpela wok sori.’ Wessling i ting olsem wanem long dispela? Em i tok, “Mi bilip olsem Konpesio [olsem autim sin] i save helpim man long i stap gutpela long ol samting bilong spirit. Tasol mi tingting planti long pasin bilong ol Katolik long mekim konpesio.”
Tasol tok bilong Baibel long konpesio, olsem autim sin, i narapela kain long dispela. Bikpela samting tru, em yumi mas autim sin bilong yumi long God. (Song 32:1-5) Na Jems, em disaipel Kristen, em i tok: “Ating wanpela bilong yupela i gat sik? Orait em i mas singautim ol hetman bilong sios i kam long em. . . . Na ol i mas prea long God i ken mekim em i kamap orait gen. Olsem na yupela wan wan i mas autim sin bilong yupela long ol arapela manmeri bilong God. Na yupela wan wan i mas prea long God i helpim ol arapela, na bai God i mekim yupela i kamap orait gen.”—Jems 5:14, 16.
Sapos bel bilong Kristen i gat tok long wanpela rong em i bin mekim, em inap singautim ol wasman bilong kongrigesen, em ol inap givim sampela gutpela tok bilong Baibel long em bilong helpim em long lusim pasin nogut bilong em. Man i gat sik bilong spirit olsem, orait taim ol wasman i lukim em i wok long senisim pasin bilong em, sampela taim ol i ken givim tok long em bilong strongim em long kamap gutpela gen. Dispela em i narapela kain tru long pasin nating bilong mekim konpesio, olsem autim sin, em ol lotu i save mekim long nau! Ol man i bin mekim rong na ol i tanim bel, ol elda bilong kongrigesen i save helpim ol na bel bilong ol inap i stap isi gen olsem Devit, em i tok: “Bihain mi bin autim sin bilong mi long yu. Mi no haitim pasin nogut bilong mi. Mi ting olsem, mi laik autim olgeta sin bilong mi long Bikpela. Mi autim pinis na yu tekewe . . . sin bilong mi.”—Song 32:5.