Pasin Sori i Kirapim Ol Long Mekim
WANPELA gutpela meri long Kanada man bilong em i dai pinis, em i save mekim gut long ol man, na em i wok strong long helpim ol 4-pela yangpela pikinini meri bilong em long kamap Kristen tru. Ol elda long kongrigesen i lukim olsem i gat wok long stretim planti samting long haus bilong em na em yet i no gat mani o save long mekim dispela wok. Olsem na ol elda i tingim tok bilong 1 Timoti 5:9, 10, na long gutpela tingting ol i stretim rot bilong mekim dispela wok bilong helpim em. Ol i mekim wanem?
Ol i stretim rot bambai dispela meri wanpis na ol pikinini i ken lusim haus inap 5-pela de. Winim 80 manmeri long kongrigesen i givim bel olgeta long helpim wok—ol i givim nating ol plang na nil samting, na mani, na taim bilong ol. Orait, famili i lusim pinis haus na kwiktaim planti wokman i gat laik tru long mekim wok ol i pulap long haus. Ol i stretim olgeta hap bilong haus ausait. Ol i stretim ol banis bilong haus na penim. Ol i mekim wok long masin i gat sanpepa na stretim ol plua na penim gen. Ol i putim ol tail na nupela mat long plua. Ol i wokim gut olgeta samting bilong paua na ol lait. Sampela sia samting i olpela pinis, ol i rausim na putim nupela. Insait long 5-pela de tasol haus i kamap nupela gen!
Ol manmeri bilong dispela hap i lukim ol i mekim bikpela wok na ol i amamas long mekim. Wanpela lapun man i stap klostu em i gat 80 krismas na em i pilim tru gutpela pasin ol dispela Witnes i mekim, olsem na em i kisim liklik bros bilong penim haus na em i strong long i kam helpim ol. Bos bilong wanpela Witnes i givim nating samting bilong stov bilong klinim win long haus kuk long taim bilong kukim kaikai. Bos bilong narapela Witnes i givim nating ol nupela sarang bilong haus kuk. Wanpela man i pilim tru gutpela wok ol i mekim na em i laik kisim sampela save moa long ol Witnes Bilong Jehova, olsem na ol i givim buk Yu Inap i Stap Oltaim Long Paradais Long Graun long em na em i amamas long kisim.
Taim dispela meri wanpis na ol pikinini i kam bek long haus ol i kirap nogut tru. Bikpela aiwara i kamap, na ol i amamas wantaim na lap, na holim ol brata sista—ol i pilim tru pasin sori ol i bin mekim. Kongrigesen i mas laikim tru na tingim tru ol brata sista bilong ol i sot long samting—dispela em i wanpela mak bilong ol Kristen tru, olsem Pol i tok: “Wanem taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.”—Galesia 6:10.