‘Olsem Ain i Sapim Ain’

KLOSTU long yia 300, wanpela yangpela man, nem bilong em Antoni, em ol man i kolim em wanpela “Kristen Koptik,” em i lusim ol man na i go i stap wanpis long ples wesan nating inap olsem 20 yia. Bilong wanem em i mekim olsem? Em i pilim dispela em i gutpela rot bilong mekim wok bilong God. Dispela man bilong i stap longwe long ol narapela man em i namba wan man i gat nem Kristen em i gat strong long kirapim ol narapela long mekim olsem.

Long nau, wan wan man tasol bilong misin i save go i stap long hap i no gat man. Tasol planti man i laik stap wanpis long narapela rot. Ol i no laik tru long toktok wantaim ol narapela long ol samting bilong lotu. Ol i pilim olsem dispela inap kirapim kros na pait. Bikpela samting bilong lotu bilong ol i olsem ol i no ken mekim nogut long ol narapela.

Tru, hap wok bilong man i bihainim lotu i tru i olsem em i no ken mekim nogut long ol narapela, tasol i gat sampela samting moa em i mas mekim. Wanpela savetok bilong bipo em i tok: “Ol i save wokim samting long ain bilong sapim ain. Olsem tasol, wanpela man i save helpim tingting bilong narapela man i kamap gutpela.” (Sindaun 27:17) Baibel i kirapim ol Kristen long bung wantaim​—⁠ol i no ken i stap longwe olgeta long ol man bilong dispela graun o long ol narapela Kristen, nogat. (Jon 17:​14, 15) Baibel i tok: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim.” (Hibru 10:​24, 25) Ol Witnes Bilong Jehova i save bihainim dispela tok. Tripela taim long olgeta wik ol i save bung wantaim ol wanbilip bilong ol bambai narapela i ken ‘sapim tingting bilong narapela,’ olsem strongim bilip bilong narapela. Ol i save taim ol i toktok long Baibel na ol i no giaman, dispela i no kamapim pait​—⁠i helpim ol long i stap wanbel wantaim. Dispela em i bikpela samting bilong lotu i tru.