Kot i Go Pas Long Wanpela Wok Em i Mekim
LONG Epril 1995, wanpela meri i winim kot na dispela i bikpela samting tru. Hevi bilong dispela meri i kirap long Janueri 28, 1992. Long dispela de, Luz Nereida Acevedo Quiles, em i gat 24 krismas, em i go slip long haus sik El Buen Pastor long Pueto Riko bilong ol dokta i ken katim em. Taim em i go long haus sik, em i tokim ol long maus na long pepa olsem em i wanpela Witnes Bilong Jehova na em i no laik kisim blut. (Aposel 15:28, 29) Ol lain bilong haus sik na dokta i katim em, ol i save gut long tingting bilong em.
Tupela de bihain long ol i katim em, Luz i lusim bikpela hap blut na long dispela as em i sot tru long blut. Dokta i lukautim em long dispela taim, em Dokta José Rodríguez Rodríguez, em i ting i gat wanpela rot tasol bilong helpim em—ol i mas givim blut long em. Olsem na, dispela dokta i go long kot bilong kisim tok orait long givim blut long Luz, tasol Luz i no save long dispela samting na dokta i no kisim tok orait long em long mekim olsem.
Tingting bilong Luz i wok gut na em yet inap toktok, tasol Dokta Rodríguez Rodríguez i strong long tokim kot ol i no ken wet long kisim tok orait long wanpela, long wanem, taim i sot pinis bilong helpim meri—nogut em i dai. Namba wan loya bilong provins, Eduardo Pérez Soto, em i sainim pepa, na namba wan jas bilong provins, Bikman Ángel Luis Rodríguez Ramos, em i tok kot i orait long Luz i kisim blut.
Olsem na long Janueri 31, 1992, ol i bringim Luz i go long rum bilong katim ol man na givim blut long em. Taim ol i wok long givim blut long em, em i harim sampela i lap. Na sampela i krosim em na ol i tok, dispela samting ol i mekim long em, em bilong helpim em. Long olgeta strong bilong em, Luz i wok long sakim ol, tasol em i no inap. Long dispela de, ol i bin givim 4-pela bek blut long Luz.
Dispela samting i painim Luz i painim pinis sampela narapela Witnes Bilong Jehova long Pueto Riko—paslain na bihain long em. Paslain long ol i subim Luz long kisim blut, kot i tok na ol i bin subim 15-pela narapela Witnes ol i bikpela pinis long kisim blut—maski ol i no laik—na ol i mekim yet dispela samting. Sori tru, wanpela taim dokta i bihainim dispela tok bilong kot na em i givim blut long wanpela Witnes long taim tingting bilong em i dai.
Ol i bin daunim strong bilong Luz na givim blut long em, tasol strong bilong em long pait i stap yet. Long Oktoba 1993, em i kotim gavman bilong Pueto Riko (Commonwealth of Puerto Rico). Namba Wan Kot long provins i harim kot bilong em na long Epril 18, 1995, ol i tokaut olsem meri i winim kot. Dispela kot i tok, tok bilong narapela kot long subim meri long kisim blut em “i no stret long lo konstitusen na i pasim dispela meri long bihainim wanem lotu em yet i laikim, em dispela i no gat tambu, na i pasim em long bosim wanem samting em i laik ol i ken mekim o no ken mekim long skin bilong em, na ol i no givim rot pastaim long meri i ken apil long kot.”
Dispela tok bilong kot em bikpela samting, long wanem, em namba wan taim wanpela kot long Pueto Riko i bin mekim wanpela tok i helpim ol Witnes Bilong Jehova taim ol i kotim dokta long givim blut long wanpela. Dispela tok bilong kot i kirapim planti toktok. Ol lain bilong nius i mekim wanpela bung, na ol niusman bilong ol bikpela niuspepa, na redio, na televisen i kam bung.
Long nait long wanpela program long redio, ol i givim askim long wanpela loya i bin helpim Luz. Ol i singautim ol man i harim program long ring i kam na mekim sampela askim. Planti dokta na loya i bin mekim olsem na ol i tok amamas long ol tok bilong Namba Wan Kot. Wanpela man i ring i kam, em i tok: “Ol saientis i no inap save tru olsem blut bai i helpim wanpela man long i stap laip o nogat, na ol man i ting blut i save helpim man olsem, ol i bihainim tingting giaman.” Na em i tok moa olsem: “I no longtaim na bai ol i raitim tok long ol buk olsem, dispela pasin bilong givim blut em i wanpela bikpela popaia tru bilong ol wok marasin long nau.”
Wanpela profesa bilong lo i gat nem, em i ring i kam long brens-ofis bilong Sosaiti Was Taua na em i tok em i amamas tru long dispela “bikpela win.” Na em i tok, dispela tok em kot i mekim, em i stret long lo konstitusen na em bai helpim olgeta manmeri bilong Pueto Riko—i no ol Witnes Bilong Jehova tasol.