Buk Singsing Irina i Save Laikim Tru

I NO longtaim i go pinis na Irina, wanpela liklik meri i gat 9-pela krismas, em bilong Sofia, Balgeria, em i bin kisim baptais na kamap wanpela Witnes Bilong Jehova. Em i laik tru long singsing na em i save amamas tru long mekim ol singsing i stap long buk Mekim Singsing Long Jehova. Olsem na Irina i putim mak em i laik winim, olsem em i laik lainim 2-pela o 3-pela singsing long olgeta mun na putim olgeta tok bilong singsing long tingting bilong em.

Wanpela samting Irina i save laik tru long lainim long skul, em musik. Tasol taim musik-tisa bilong em i askim em long go insait long kwaia, olsem lain bilong mekim singsing long skul, em i no laik, olsem na tisa i hatwok long save bilong wanem Irina i no laik. Irina i save, planti singsing ol i bilong litimapim nem bilong ol man long kantri bilong em, em ol i bin mekim bikpela wok bilong helpim kantri, na ol holide em ol lotu haiden i as bilong en. Sampela singsing i save kamapim pasin bikhet na pait bilong kirapim ol man long bihainim sampela pasin ol i tok em i bilong litimapim kantri. Irina i laik kamapim tingting bilong em long tisa, olsem na em i raitim pas long tisa na kamapim bilip bilong em​—⁠tasol dispela i no stretim tingting bilong tisa liklik.

Papa bilong Irina i gat wanpela tingting. Em i givim long tisa wanpela buk Mekim Singsing Long Jehova. Sampela de bihain, tisa i singautim Irina i go insait long rum bilong mekim musik. Tisa i askim Irina long mekim sampela singsing em Irina i laikim tru, em ol i stap long dispela buk singsing​—⁠taim ol wanklas bilong Irina i stap​—⁠na tisa bai wokim musik long piano. Irina i singsing winim wan aua! Olsem na tisa i mas tokaut stret olsem buk singsing em Irina i save laikim tru i gat sampela naispela singsing tru long en.