Tok i Tru Bilong Gutnius

KIRAP long 1901, wanpela skul long Oksfot, Inglan, em Magdalen College, ol i bin holim tripela liklik hap bilong wanpela rait bilong gutnius Matyu i raitim, ol i kolim P⁶⁴. Inap sampela taim nau, ol saveman i bilip olsem ol man i bin raitim dispela tripela hap rait klostu long yia 200.

I no longtaim, Carsten P. Thiede, wanpela saveman bilong stadi long ol olpela rait, long Padabon, Jemani, em i skelim gut dispela rait P⁶⁴, em i gat ol hap tok bilong 10-pela ves bilong sapta 26 bilong Matyu. Em i painim wanem samting? Long wanpela nius, Thiede i tok olsem, tripela hap rait bilong Oksfot em “wanpela hap bilong rait Kristen long taim bilong ol aposel, ating em sampela yia paslain long yia AD 70.”​—⁠Zeitschrift für Papyrologie und Epigraphik (Nius bilong stadi long olpela buk na ol olpela hap rait).

Dispela tok Thiede i mekim i kirapim bikpela toktok liklik long ol nius na long bung bilong ol saveman. Bilong wanem? Long wanem, ol i save ting hap rait bilong Gutnius i olpela rait tru, em P⁵², em olpela hap rait bilong gutnius Jon i raitim, ol i bin raitim long yia 125 samting, o long yia 100 samting.

Dispela nupela det Thiede i makim bilong dispela hap rait P⁶⁴, planti saveman bai wanbel long en o nogat, em yumi no save. Tasol maski ol i ting olsem wanem, det ol i bin kolim bai makim rait P⁶⁴ em i olpela hap rait tru, winim ol narapela olpela rait bilong Gutnius i stap yet; na tu em bai kamapim long ples klia moa olsem gutnius Matyu i raitim, ol i bin raitim long taim bilong ol aposel, ating paslain long yia 70, taim planti bilong ol man i bin lukim ol samting Jisas i mekim ol i stap laip yet na ol inap tokaut olsem ol tok bilong gutnius Matyu i raitim em i tru olgeta.

[Piksa Kredit Lain long pes 32]

By permission of the President and Fellows of Magdalen College, Oxford.