Lait Bilong Yupela i Mas Kamap Klia!
EM NAU! Taim i kamap pinis bilong lapun man i lukim Mesaia! Long rot bilong holi spirit Simeon i kisim save olsem, “em bai i no inap i dai kwik. Nogat. Pastaim em i mas lukim dispela man Bikpela i bin promis long salim i kam.” (Luk 2:26) Simeon i amamas tru taim em i go insait long tempel na Maria na Josep i putim bebi Jisas long han bilong em! Em i litimapim nem bilong God, na em i tok: “Bikpela, mi wokboi bilong yu, na nau yu ken larim mi i go, na bel bilong mi i ken i stap isi . . . Ai bilong mi i lukim pinis samting yu mekim bilong kisim bek mipela. . . . Em bai i givim lait long ol man bilong ol arapela lain, na em bai i givim biknem long ol Israel.”—Luk 2:27-32; skelim wantaim Aisaia 42:1-6.
Kirap long taim Jisas i baptais long taim em i gat 30 krismas i go inap long taim em i dai, em i kamapim long ples klia olsem em i “lait” bilong graun. Em i mekim long wanem ol rot? Em i save kamapim lait bilong spirit taim em i autim tok bilong Kingdom na laik bilong God. Em i kamapim long ples klia tu ol bilip giaman em ol lotu giaman i lainim ol man long en na kamapim klia ol wok bilong tudak. (Matyu 15:3-9; Galesia 5:19-21) Olsem na Jisas inap tok stret olsem: “Mi yet mi lait bilong graun.”—Jon 8:12.
Jisas i dai long yia 33. Olsem wanem? Lait i dai pinis? Nogat tru! Taim Jisas i stap yet long graun em i tokim ol disaipel bilong em: “Lait bilong yupela i mas lait long ai bilong ol manmeri.” (Matyu 5:16) Olsem na bihain long taim Jisas i dai ol disaipel i wok yet long stap olsem lait.
Ol Kristen bilong nau i bihainim pasin bilong Jisas long kamapim lait bilong Jehova taim ol i mekim wok autim tok. Ol “i mas wokabaut olsem ol manmeri bilong lait,” na stap olsem gutpela piksa long sindaun bilong ol.—Efesus 5:8.
This article is repeated in w97 6/1.