Bilip i Kirapim Em Long Mekim Wok

TAIM Jehova i tokim Moses long bringim lain Israel i kam lusim kalabus long Isip, pastaim Moses i tok em i no inap mekim. Em i tok: “Bikpela, bipo mi no man bilong toktok gut long ai bilong planti man. Na nau yu toktok wantaim mi, tasol dispela i no mekim mi i kamap man bilong toktok. Maus bilong mi i hevi tumas, na mi no inap toktok gut.” (Kisim Bek 4:​10) Yes, Moses i pilim olsem em i no inap mekim gut dispela bikpela wok.

Planti wokboi bilong Jehova long nau, sampela taim ol tu ol i pilim olsem ol i no inap mekim tru ol wok ol i mas mekim. Olsem: Wanpela wasman Kristen, Theodore, em i tok: “Long olgeta wok Jehova i bin givim long mi, mi hatwok moa long mekim wok autim tok. Taim mi yangpela, mi save wokabaut kwik i go long haus na giaman paitim dua na isi isi mi lusim haus, nogut man bilong haus i lukim mi o harim sampela pairap. Taim mi kisim sampela krismas moa, mi no mekim moa dispela pasin, tasol taim mi tingting long go long ol haus na autim tok, mi save pilim sik. Long nau tu, paslain long taim mi go autim tok mi save pilim olsem mi laik traut, tasol maski mi pilim olsem, mi go tasol.”

Wanem samting i bin helpim Moses na ol Witnes bilong nau, olsem Theodore, long karim dispela kain pasin bilong pret? Baibel i tok: “Moses i bilip long God, olsem na em i kirap na i lusim Isip. . . . Moses i mekim wankain pasin olsem man i bin lukim God, na em i stap strong tru.”​—⁠Hibru 11:⁠27.

Tru tumas, Moses i bilip long Jehova na dispela i helpim em long winim pasin bilong pilim olsem em i no inap. Em i kirap na inapim tru ol wok em i kisim olsem jas, profet, gopas bilong ol Israel, namelman bilong kontrak bilong Lo, hetman, man bilong raitim stori bilong bipo, na em i raitim sampela hap bilong Baibel.

Olsem na sapos yumi kisim bilip wankain olsem bilong Moses, yumi tu bai wokabaut olsem yumi “lukim God.” Kain bilip olsem bai strongim bel bilong yumi na helpim yumi long mekim olgeta wok Kristen yumi mas mekim, maski sampela taim yumi pilim olsem yumi no inap.