Em i Mekim Wok Bilong Jehova Long Pasin Daun
“YU MEKIM wok we, em i no bikpela samting; yu mekim wok bilong husat, em bikpela samting.” John Booth i mekim dispela tok na em i bihainim dispela tok long olgeta taim. Laip bilong em hia long graun, i pinis long Mande, Janueri 8, 1996, i kamapim klia em i bin mekim wok bilong husat.
Long 1921, taim em i wanpela yangpela man, John Booth i bin wok long painim as bilong i stap bilong em. Em i lainim ol pikinini long Sande-skul bilong Misin Dats Rifom, tasol em i no laik kamap wanpela pasto, long wanem, em i pilim olsem ol pris pasto ol i man bilong tingim ol yet tasol. Taim em i lukim wanpela pepa i kamapim toksave bilong wanpela tok em het-tok bilong en “Planti Milion Man i Stap Nau Ol i No Ken i Dai,” kwiktaim em i salim pas na askim long kisim ol buk samting dispela pepa i bin tokaut long en. Samting em i bin kaunim i pulim tru tingting bilong em na i no longtaim em i kikim wilwil inap 24 kilomita bilong i go long ol miting bilong ol Sumatin Bilong Baibel, em olpela nem bilong ol Witnes Bilong Jehova. Em i baptais long 1923 na em i kirap autim tok long ol haus long hap bilong Walkil, Nu Yok, em ples famili bilong em i gat wanpela fam.
Long Epril 1928 Brata Booth i kirap long mekim wok painia. Em i autim tok long ol hap bilong ples bilong em yet na long ol liklik ples long hap saut bilong Amerika, na em i senisim ol buk bilong Baibel long kaikai na ples slip. John Booth i no surik long ol bos bilong ol ples bilong wokim strongpela dring long pasin hait; ol i save holim gan, na wanpela bilong ol i bin sutim na givim hap bagarap long poroman painia bilong em. Long 1935 ol i makim Brata Booth long kamap wanpela wasman bilong raun na em i kirap long i go lukim ol kongrigesen na ol liklik grup long olgeta hap bilong kantri. Em i stretim rot long mekim ol kibung na helpim ol brata na sista long wok strong maski ol man i birua long ol. Ol bikpela lain i bung bung na i kros long em, em i sanap long kot, na em i stap long kalabus; olgeta dispela hevi i save painim Brata Booth long olgeta taim. Wanpela taim em i bin tok olsem: “Sapos mi laik kamapim olgeta liklik samting i bin painim mi long dispela taim, bai mi mas raitim wanpela buk.”
Long 1941, Joseph F. Rutherford em i presiden bilong Sosaiti Was Taua na em i makim Brata Booth long wok long Kingdom Fam, klostu long Itika, Nu Yok. Long dispela hap em i bin stap gut long wok bilong em inap 28 yia. Laik bilong em long mekim wok autim tok i strong yet, na inap planti yia, em i amamas tru long bung wantaim planti tausen sumatin bilong Wastaua Baibel Skul Bilong Gileat, em skul bilong lainim ol sumatin long mekim wok misineri na em i bin stap long hap bilong Kingdom Fam i go inap 1961. Long 1970, ol i askim Brata Booth long i go wok long Wastaua Fam long Walkil, Nu Yok, olsem na em i go long dispela hap em i bin kirap long mekim wok painia long en inap 45 yia i go pinis.
Long 1974, ol i makim Brata Booth long kamap wanpela memba bilong Lain Bilong Bosim Ol Witnes Bilong Jehova long Bruklin, Nu Yok. Em i stap gut long dispela wok i go inap long taim em i gat 93 krismas na em i dai. Ol i laikim tru John Booth, long wanem, em i gat gutpela pasin daun na ol gutpela pasin Kristen. Em i stap gut long wok bilong autim tok long ol haus na long ol rot long biktaun i go inap long taim em i gat sik na em i no gat strong moa bilong mekim wok.
Ol man i bin wok wantaim em ol i bel hevi long i dai bilong em, tasol ol tok promis bilong Baibel long ol Kristen em God i bin makim ol long spirit holi i mekim gut bel bilong ol. Baibel i tok, ol i kirap bek bilong kisim laip long heven na “gutpela pasin ol i bin mekim, em i go wantaim ol.” (KTH 14:13; 1 Korin 15:51-54) Heven em i wanpela nupela ples long ol, tasol em ples John Booth bai mekim wok bilong Jehova inap oltaim oltaim!
[Piksa long pes 32]
John Booth 1903-1996
[Piksa long pes 32]
HERALD-AMERICAN, ANDOVER 1234
76 Jehovites Jailed in Joliet
[Kredit Lain]
Chicago Herald-American