Jas Bilong Bipo i Tok Sori—Bihain Long 45 Yia
LONG Ogas 1995, long wanpela rum bilong haus kot long Belin, wanpela jas bilong Sprim Kot bilong bipo i tokim wanpela Witnes Bilong Jehova em i sori long wanpela rong em i bin mekim 45 yia i go pinis.
Long Oktoba 1950, Sprim Kot bilong Ripablik Demokratik Bilong Jemani i tok 9-pela Witnes Bilong Jehova i gat asua long birua long kantri na lukstil long ol samting bilong kantri. Kot i tok tupela Witnes i mas kalabus i go inap long taim ol i dai, na ol narapela 7-pela i mas kalabus inap planti yia—wanpela bilong ol em Lothar Hörnig, em i bin i gat 22 krismas, na long poto em i namba 4 man sapos yu kirap long kaunim long han sut.
Foti yia bihain Ripablik Demokratik Bilong Jemani i kamap hap bilong Ripablik Federal Bilong Jemani. Kirap long dispela taim ol ofisa bilong gavman i mekim wok bilong kisim save long sampela pasin nogut i bin kamap long Ripablik Demokratik Bilong Jemani na ol i traim long kotim ol man i bin mekim. Wanpela pasin nogut i bin kamap long 1950 taim Sprim Kot i bin kotim ol Witnes.
A. T., nau em i gat 80 krismas, em i wanpela bilong 3-pela jas i bin wokim kot bilong dispela 9-pela Witnes. Nau em i sanap long kot bilong provins long Belin, long wanem, bipo em i bin paulim kot, na em i mas kamapim as bilong dispela kot em i bin wokim bipo.
Dispela jas bilong bipo i tokim kot, i tru 45 yia i go pinis em i bin wanbel wantaim ol narapela jas long kalabusim ol dispela Witnes, tasol em i no bin wanbel long ol i mas kalabus inap planti yia olsem. Tasol dispela kot i bin kirapim gen tingting bilong em. Wanem samting i mekim na tingting bilong em i kirap? Ol Witnes Bilong Jehova i bin kisim nogut long ol Natsi long taim bilong Namba 2 Pait, long wanem, ol i no laik helpim wok bilong Hitler. Bihain long pait, gavman Komyunis i bin mekim nogut gen long ol Witnes. Dispela i mekim na jas hia i bin “tingting planti tru.”
Lothar Hörnig i tokim kot, inap 5-pela yia na hap ol i putim em i stap wanpis long wanpela rum kalabus, na long 1959 tasol em inap long lusim kalabus long Brandenbek. Taim jas bilong bipo i harim dispela tok bilong Hörnig em i krai na i tok: “Mi sori tru.” “Plis lusim rong bilong mi.” Hörnig i orait long mekim olsem.—Skelim wantaim Luk 23:34.
[Piksa Kredit Lain long pes 32]
Neue Berliner Illustrierte