Yu Inap “Sanap Strong Olsem Laion”

SAMPELA taim Baibel i stori long laion bilong makim pasin bilong strongim bel na no ken pret. Baibel i tok, ol man i gat strongpela bel na i no pret ol i “sanap strong olsem laion,” na ol stretpela man ol i olsem ‘yangpela laion i no pret.’ (2 Samuel 17:10; Sindaun 28:1, NW) Long taim ol birua i laik pait long laion, long dispela taim em i kamapim klia olsem i stret ol man i tok em i “strong tumas na i winim ol narapela animal.”​—⁠Sindaun 30:30.

God Jehova i tok piksa long pasin bilong laion long no ken pret, bilong makim olsem em i tingting strong long lukautim ol lain bilong em. Aisaia 31:4, 5 i tok: “Taim wanpela laion i stap kaikai sipsip em i bin kilim, em i no inap pret na lusim dispela sipsip na ranawe, maski sapos planti wasman bilong sipsip i kam bung na singaut na bikmaus long en. Nogat. Em bai i kros long ol na was gut long dispela sipsip. Olsem tasol mi, Bikpela I Gat Olgeta Strong, bai mi kam pait long taun Jerusalem long maunten Saion . . . Oltaim bai mi stap sambai long em na kisim bek em na lukautim em.” Long dispela tok Jehova i strongim ol wokman bilong em olsem em bai lukautim ol, na em bai i mekim moa yet long taim bilong hevi.

Baibel i tok, Satan em dispela nambawan birua bilong olgeta lain manmeri, em i olsem laion i laik kaikai man na i singaut strong. Bilong Satan i no ken bagarapim yumi, Baibel i toksave long yumi olsem: “Yupela i mas stap redi na was gut.” (1 Pita 5:8) Wanpela rot bilong mekim olsem em yumi no ken slip long samting bilong spirit. Olsem na Jisas i tok: “Tasol yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi.” (Luk 21:34-36) Yes, sapos nau long taim bilong “las de” yumi was i stap long ol samting bilong spirit dispela inap helpim yumi long “sanap strong olsem laion” na yumi ‘no ken pret’ na yumi ‘bilip strong long Bikpela.’​—⁠2 Timoti 3:1; Song 112:7, 8.