“No Ken Rausim Ol!”

“SAPOS wanpela o tupela Witnes Bilong Jehova i pairapim belo bilong dua bilong yu, yu no ken rausim ol!” Nius Corriere della Sera i mekim dispela gutpela tok. Dispela nius i toktok long wanpela samting i bin kamap long Treviso long not Itali, long taim wanpela bisnisman klostu i lusim olsem wan milion lire (olsem K800), long wanem, em i rausim tupela Witnes em ol i go long lukim em.

Olsem nius i tok, tupela Witnes i kirapim tok long dispela man na ol i tok: “Nau em i gutpela taim bilong yu. Mipela ol Witnes Bilong Jehova, na mipela i gat samting i gutpela tru bilong givim long yu.” Taim ol i tok olsem, dispela bisnisman i no gat gutpela pasin pren em i pasim dua, na i no larim ol i pinisim tok bilong ol.

Sapos dispela man i bin harim, em inap kisim save olsem ol Witnes i bin i go long haus bilong em bilong givim bek paus mani bilong em ol i bin painim long ples bilong malolo long nambis. Olsem na dispela ol Witnes i no inap mekim sampela samting moa​—⁠ol i kirap kisim dispela paus mani na ol samting i stap insait long en i go long polis–tesin i stap klostu. Long narapela de ol polis i bekim paus i go long man i bin lusim.

Nius Il Gazzettino di Treviso i tok: “Sapos narapela man i bin insait long dispela kain samting olsem dispela tupela tarangu Witnes, ating bai em inap . . . kisim ol samting i stap insait long paus. Tasol ol Witnes Bilong Jehova i mas bihainim stretpela pasin tasol.”

Wanem samting i save kirapim ol Witnes Bilong Jehova long bihainim stretpela pasin? Ol i laikim God na ol man i stap klostu long ol, na dispela i stret wantaim ol tok Jisas Krais i bin kolim. (Matyu 22:​37-39) Long dispela as na ol Witnes Bilong Jehova i save go long ol wan wan haus bilong autim tok long naispela “nupela graun” em God Jehova i bin promis long en. Kain gutpela promis olsem yumi inap tingim na wet long en i gutpela tru, winim olgeta samting bilong skin!—⁠2 Pita 3:⁠13.