Stori Bilong Tait Wara i Helpim Tok Bilong Baibel
BIKPELA Tait Wara long olgeta hap bilong graun long taim bilong Noa em samting i bin kamap tru tru long bipo. Sampela hap stori bilong dispela Tait i stap long ol stori i bin kamap bipo long ol narapela narapela hap bilong graun. Long kantri Sat long hap bilong Afrika, lain Musaye i save stori long Tait olsem:
‘Long wanpela taim long bipo yet, long wanpela longwe ples, i gat wanpela famili i stap. Wanpela de, mama bilong dispela famili i laik redim bikpela kaikai bilong ol famili bilong em. Olsem na em i kisim tupela ston bilong brukim wit na em laik brukbrukim wit i kamap plaua. Long dispela taim skai i bin i stap klostu tru—i no olsem nau. Na taim yu apim han bilong yu, yu inap holim. Em i taitim bun long brukbrukim wit, na ol wit em i brukim i tanim i kamap plaua kwiktaim. Tasol taim dispela meri i brukim wit, em i no tingting na em i apim ston bilong brukim wit i go antap tumas, na em nau, em i mekim hul i kamap long skai! Wantu tasol, bikpela wara tru i pundaun long graun. Em i no kain ren olsem i save pundaun long nau. Ren i bin pundaun inap 7-pela san na 7-pela nait na wara i pulap long olgeta hap bilong graun. Taim ren i pundaun, skai i kirap long i go antap, na em i go antap tru olsem nau em i stap. Olsem na nau yumi no inap holim skai.’
Long olgeta hap bilong graun yumi inap painim ol hap hap stori bilong bipo long bikpela tait wara. Ol lain bilong bipo olsem ol Amerika na ol Aborijini bilong Ostrelia, olgeta i gat stori bilong dispela samting. Ating ol liklik liklik samting bilong ol stori i narapela narapela kain, tasol planti stori i gat wankain tingting long en, olsem wara i bin karamapim graun na sampela manmeri tasol i abrusim bagarap—ol i stap long wanpela kanu ol man yet i bin wokim. Ol stori bilong olgeta hap bilong graun long bikpela tait wara i kamapim tru olsem Bikpela Tait Wara i bin kamap long olgeta hap bilong graun olsem Baibel i stori long en.—Stat 7:11-20.