Truim Bilong Tok Profet Bilong Baibel
LONG haus bilong lukim ol samting bilong pait bilong bipo (Imperial War Museum) long Landon long Inglan, ol i putim ples klia wanpela klok i narapela kain na wanpela masin ol namba bilong en i save senis senis. Taim han bilong klok i raunim klok, long olgeta 3.31 sekon namba long masin i save senis. Taim han bilong klok i kamap long olgeta wan wan mak, masin i bungim nupela namba wantaim olpela na namba i go antap. Olgeta wan wan mak na wan wan namba i makim wanpela man, meri o pikinini i dai long pait kirap long yia 1900 samting i kam inap long nau.
Dispela masin i kirap bungim ol namba long Jun 1989, na long 12-klok nait long pinis bilong laspela de bilong yia 1999 em bai pinis long bungim olgeta namba. Long dispela taim namba long klok bai kamap olsem wan handet milion, em namba bilong ol manmeri i dai long pait kirap long yia 1900 i go inap long yia 2000.
Klostu 2000 yia bipo, Krais Jisas i bin toktok long wanpela taim bai i kamap na “ol man bilong sampela lain bai i kirapim pait long ol narapela narapela lain. Na ol lain bilong sampela king bai i kirapim pait long ol lain bilong ol narapela narapela king.” Olsem na inap longtaim pinis ol Witnes Bilong Jehova i wok long autim tok long ol man olsem ol bikpela bikpela guria, bikpela hangre, na bikpela sik, na bikpela bikpela pait i kamap nau long dispela taim, na ol narapela narapela hevi tu—olgeta i kamapim klia olsem yumi stap long taim bilong “las de,” kirap long taim Krais Jisas i kisim wok king long heven long 1914.—Luk 21:10, 11; 2 Timoti 3:1.
Nius Wastaua em Baibel i as bilong ol tok bilong en, em i toksave long gutpela nius olsem klostu nau Kingdom bilong God bai bagarapim olgeta man i save mekim nogut long ol man na em bai mekim graun i kamap paradais. Na olsem wanem? Pait bai i stap yet? Nogat. Baibel i tok: “Kaman! Yupela lukim wok Bikpela i mekim. Bai bel bilong yupela i kirap nogut long planti narakain samting em i mekim long graun. Em i save mekim i dai pait long olgeta hap graun. Em i save brukim olgeta banara na spia, na i save kukim ol hap plang long paia.”—Song 46:8, 9.
[Piksa Kredit Lain long pes 32]
Piksa bilong klok: By Courtesy of the Imperial War Museum