“Yumi Olgeta i Bilong Wanpela Famili Tasol”
NAU long dispela taim, pasin birua namel long ol lotu na ol man bilong narapela skin i go kamap long olgeta hap bilong graun. Pasin bilong birua long ol lain bilong narapela skin i kirapim ol man long kilim i dai ol man, mekim nogut tru long ol man, na mekim ol narapela pasin nogut tru i gat sem. Wanpela ripot bilong lain Amnesty International i tok, long 1994 winim 23 milion manmeri long olgeta hap i mas ranawe lusim ples bilong ol, long wanem, ol man i mekim nogut long ol.
Long Ruanda, ol i bin kilim i dai samting olsem 500,000 manmeri, na 2,000,000 ol narapela i bin kamap refyuji taim pait i kamap namel long lain Tutsi na lain Hutu. Nius Le Soir bilong Beljam i tok, “ol i mekim nogut long ol Witnes Bilong Jehova, long wanem, ol i no laik holim ol gan samting bilong pait.” Ol Witnes Bilong Jehova i no save insait long ol pait. Tasol ol i bin kilim i dai planti handet Witnes long dispela pait. Dispela i mekim na yumi tingim tok Jisas i bin mekim long ol disaipel: “Yupela i no man bilong dispela graun. . . . Olsem na ol manmeri bilong graun i save birua long yupela.”—Jon 15:19.
Wanpela famili Witnes—Eugène Ntabana, meri bilong em, na tupela pikinini—ol i bin i stap long biktaun, Kigali. Taim em i kamapim klia long ol man i stap klostu long em olsem ol Kristen i no save insait long ol pait bilong dispela graun, Eugène i save stori long diwai bougainvillea, wanpela kain diwai plaua i save kamap gut maski em i taim bilong san.—Matyu 22:21.
Eugène i save tok: “Hia long Kigali, diwai bougainvillea i save kamapim retpela, pink, na sampela taim ol waitpela plaua. Tasol olgeta i bilong wanpela famili tasol. Em i wankain tu long ol manmeri. Maski yumi bilong narapela narapela hap, o skin, o lain, yumi olgeta i bilong wanpela famili tasol, em famili bilong yumi manmeri.”
Tasol sori tru, maski dispela famili i gat pasin bilong i stap isi na i no insait long pait, ol man nogut i bin kilim ol i dai. Tasol ol i bin stap gut long God na ol i dai. Yumi ken save tru olsem, God Jehova bai inapim tru tok promis bilong em long ol kain man olsem, na ol bai kirap bek na i stap long dispela taim i no gat wanpela man bai tingting nogut long narapela. (Aposel 24:15) Long dispela taim bihain, dispela famili, wantaim ol narapela, bai “ol i sindaun gutpela tumas na amamas i stap.”—Song 37:11.