Husat Ol Bai Autim Tok?
LONG wanpela Bikpela Bung Bilong Ol Misin inap 40 yia i go pinis, ol i bin tokim ol misin long “kirapim pasin bilong autim tok,” na long lainim ol sipsip bilong ol long “i go mekim wok autim tok.” Faipela yia bihain John A. O’Brien, wanpela pris Katolik, em i tok, ol i gat wok long kamapim ol disaipel long “rot bilong i go long ol man” na i no long “rot bilong i stap tasol long haus bilong yumi.” Na long Janueri 1994, pop John Paul Namba 2, em i bin tok olsem, nau em “i no taim bilong sem long Gutnius, em taim bilong sanap antap long ol rup na autim long ol manmeri.”
Tasol i olsem ol i pasim yau na i no harim ol tok bilong kirapim ol long autim tok. Wanpela stori long nius Illawarra Mercury bilong Ostrelia i tok: “Sampela bikman Katolik bilong hap Saut, ol i no gat laik long bihainim wankain pasin olsem bilong ol Witnes Bilong Jehova insait long lotu bilong ol.” Wanpela man i tok, pasin bilong autim tok “em i no tingting bilong ol Katolik.” Narapela man i tok: “I gutpela Misin i litimapim lotu bilong en, tasol i no gutpela ol i mekim long rot bilong i go long haus bilong ol man. Ating i gutpela moa long kamapim ol klas bilong lotu, o salim ol tok long rot bilong pas.” Wanpela man bilong bosim wanpela bikpela haus lotu, em tu i no klia olsem wanem ol i ken bihainim ol tok bilong pop. Em i tok: “Mipela bai strongim ol manmeri long bihainim Gutnius ol i save long en long i stap bilong ol yet. Tasol ol i mas i go long haus bilong ol man na autim tok o nogat, em wanpela samting mi no laik toktok long en.” Het-tok bilong dispela stori long nius i kamapim gut tok olsem: “Ol Katolik i no laik bihainim tok bilong pop long i go autim tok.”
Maski ol misin i lus tru long autim tok, winim 5 milion Witnes Bilong Jehova ol i bihainim tok bilong Jisas long “i go mekim olgeta lain manmeri i kamap disaipel.” (Matyu 28:19, 20; skelim wantaim Aposel 5:42.) Ol i save mekim dispela wok bilong autim tok long haus bilong ol man long 230 samting kantri. Tok ol i save autim em i gutpela tok tru, na i kamapim tok promis bilong Baibel long ol samting bai kamap bihain. I gutpela yu toktok wantaim ol taim ol i kam gen long haus bilong yu.