Husat i Gat Asua Long Ol Pait?

YU TING God i gat asua long ol pait ol man i mekim? Martin Niemöller, em wanpela pasto bilong lotu Talatala long Jemani na planti man i save long em, em i bekim dispela askim bihain liklik long pinis bilong Namba 2 Pait, em i tok: “Nogat, God i no laikim pait.” Long 1946, ol i raitim tok bilong em long wanpela buk ol i kolim Ach Gott vom Himmel sieh darein​—⁠Sechs Predigten (O God, Lukluk Long Heven i Kam Daun​—⁠Sikspela Tok).a Dispela buk i tok:

“Man i laik sutim tok long God long [ol pait] em i no save, o em i no laik save long Tok Bilong God. Tru tumas, narapela samting yumi mas skelim yet em olsem, yumi ol Kristen i gat bikpela asua long ol dispela pait i wok long kamap, o nogat. Na em i no isi long yumi long abrusim dispela askim. . . . Na yumi save tru olsem long bipo yet na i kam inap long nau, ol lotu i gat nem Kristen planti taim ol yet i go na blesim ol pait, na ol ami, na ol samting bilong pait. Ol i no bihainim pasin Kristen na ol i beten bambai ol birua i ken kisim bagarap long pait. Asua bilong ol dispela samting i stap long yumi na ol tumbuna bilong yumi, tasol i no stret yumi sutim tok long God, nogat tru. Na yumi ol Kristen long nau i mas sem long ai bilong ol lain lotu olsem ol lain Earnest Bible Students [ol Witnes Bilong Jehova], em planti handet na tausen bilong ol i bin kalabus long ol banis kalabus nogut na ol i bin i dai tu, long wanem, ol i no laik insait long ami na kilim ol man.”

Long taim bilong yumi, em 50 yia bihain long Namba 2 Pait, tok bilong Niemöller i helpim ol man i save laikim pasin bilong i stap bel isi long skelim gut ol samting. God i no gat asua long ol pait bilong ol narapela narapela kantri. Nogat tru. Tru tumas, long rot bilong ol man i lotu tru long God na ol i no insait long ol pait bilong ol man bilong dispela graun, God i tokaut olsem klostu nau em bai pinisim olgeta pait.​—⁠Song 46:9; Jon 17:⁠16.

[Futnot]

[Piksa Kredit Lain long pes 32]

Foto bilong USAF