Olgeta Buk Holi i Kamapim Tok Bilong God?
SPIRIT bilong God i bin kamapim ol tok bilong Baibel Holi. Olsem wanem? Spirit bilong God i kamapim tu tok bilong ol narapela buk em sampela i tok ol i buk holi? (2 Timoti 3:16) Wanpela nius (La Civiltà Cattolica) bilong ol Jesuit bilong Itali i bin kamapim dispela askim. “Seketeri Bilong Kantri [Vatiken] i bosim” wok bilong wokim dispela nius, olsem na ol Katolik i ting dispela tok i gat strong.
Nius bilong ol Jesuit i tok: “Long rot bilong Spirit Holi, God i bin givim sampela tok bilong em long ol man na ol i raitim sampela buk holi i no bilong ol Juda na ol Kristen.” Ol Jesuit i ting ol buk holi olsem Buk Avesta bilong lotu Soroastrian o Fopela Buk bilong lotu Konfusas ol man i bin raitim, “Holi Spirit i stiaim ol, olsem na sampela hap bilong ol i ‘kamapim tok bilong God.’ ”
Tasol dispela nius i tok moa: “I no olgeta tok i stap long ol dispela buk holi em i tok bilong God.” Na nius i tok, ating ol man i bin raitim ol dispela buk i stap na mekim wok namel long ol man i bilip long planti god na ol i bihainim tingting bilong ol saveman bilong ol. Marco Politi, em i save raitim nius long ol samting bilong Vatiken long niuspepa La Repubblica bilong Itali, em i tok “dispela tingting i opim rot long mekim ol samting bipo ol i ting em i no inap kamap namel long Misin Katolik na ol bikpela lotu bilong bipo,” na nau ol i kisim gen wankain tingting olsem i bin stap long sampela bung bilong ol lotu bilong beten wantaim, olsem dispela bung i bin kamap long Asisi long 1986, em pop John Paul Namba 2 i bin wok strong long kamapim.
Jehova em i no God bilong mekim ol samting i paul nabaut. (1 Korin 14:33) Olsem na yumi no inap tok spirit holi, o strong bilong em, bai kamapim tok, o hap tok, long ol buk em tok bilong ol i narapela kain long Tok Bilong God, em Baibel. Aposel Kristen Pol i no kirapim ol man i gat narapela narapela “pasin bilong lotu” long bung wantaim, nogat; em i tok: “Yupela [i] wetim wanpela samting tasol, . . . I gat wanpela Bikpela tasol, na wanpela pasin bilong bilip, na wanpela baptais tasol.”—Efesus 4:4, 5.
Bilong kisim dispela ‘wanpela samting yumi wetim’ yumi mas bilip long Krais Jisas. Baibel i tok stret olsem: “I no gat narapela man i inap kisim bek yumi. Nogat. Long nem bilong Jisas wanpela tasol yumi olgeta manmeri bilong graun inap i stap gut. Em wanpela tasol God i bin makim bilong kisim bek yumi.” (Aposel 4:12) Ol narapela “buk holi” i no tokaut olsem Jisas em i man bilong kamapim ol laik bilong God. Sapos yumi bilip long Baibel olsem em i tok bilong God, em bai skulim yumi long ol samting God Jehova i mekim bilong kisim bek yumi.—Jon 17:3; 1 Tesalonaika 2:13.