Ol Witnes Bilong Jehova i Win Gen Long Grik
LONG Oktoba 6, 1995, kot bilong tupela Witnes Bilong Jehova i save autim tok long olgeta de i bin kamap long Atens, na tripela majistret i bin harim dispela kot. Ol i kotim tupela long pasin bilong autim bilip bilong ol long narapela man, na wanpela plisman i bin kotim tupela Witnes bihain long ol i bin i go lukim em long haus bilong em.
Ol askim em siaman bilong ol jas i bin kamapim i soim olsem em i laik tru long save long wok bilong ol Witnes Bilong Jehova. Em i askim ol olsem: “Yupela i bin mekim dispela wok inap hamas yia? Ol man i bin mekim wanem long yupela taim yupela i mekim dispela wok? Wanem kain samting i kamap long dispela wok bilong yupela? Yupela i save tok wanem long ol man taim yupela i go long haus bilong ol?” Olgeta man i stap long rum bilong kot i putim gut yau long bekim bilong ol Witnes.
Tupela Witnes i kirap nogut, long wanem, ofisa i go pas long kotim ol, em tu i kamapim ol tok i helpim ol. Em i tok: “Ol lo bilong kantri i orait long ol Witnes Bilong Jehova i ken bilip na lotuim God bilong ol, na i no dispela tasol, lo i orait tu long ol i ken autim bilip bilong ol long haus bilong ol man, long ol ples bung, na long rot, na ol i ken tilim ol buk bilong ol i no gat pe long ol man sapos ol i gat laik long mekim olsem.” Ofisa i go pas long kotim ol i kamapim ol tok bilong sampela kot na Kaunsil Bilong Kantri em ol i bin rausim sampela kot olsem dispela. Em i kolim tu kot bilong Kokkinakis wantaim kantri Grik, em Kot Bilong Yurop i bin pasim tok olsem ol Witnes Bilong Jehova i no gat asua.a Ofisa i go pas long kotim ol i tok: “Plis tingim, gavman bilong kantri Grik i bin baim kot long dispela taim. Olsem na mipela i mas tingting gut taim mipela i mekim kain kot olsem. Tru tumas, i no stret ol man i bringim dispela samting i kam long kot.”
Taim ofisa i go pas long kotim ol i toktok pinis, i no gat as na loya bilong tupela Witnes i mas mekim planti tok. Tasol em i kamapim klia olsem dispela lo i pasim man long autim bilip bilong em long ol narapela em i no stret long mama lo na em i bin givim bikpela sem tru long kantri Grik.
Siaman bilong ol jas i lukluk tasol long narapela tupela jas, na ol i wanbel long rausim kot bilong dispela brata na sista. Dispela kot i bin kamap insait long wan aua na tenpela minit, na em i bikpela samting long nem bilong Jehova na ol lain bilong em.
Bihain long dispela kot bilong Kokkinakis em Kot Bilong Yurop i bin harim, dispela em i namba 4 taim ol i bin rausim kot bilong sampela Witnes, em ol i bin raun na autim bilip bilong ol long ol man. Ol Witnes Bilong Jehova long Grik i amamas, long wanem, nau i olsem i no gat hevi taim ol i autim tok na ol inap mekim yet wok autim tok na ol man i no pasim ol.
[Futnot]